Halyqqa saıası aıqyndyq qajet - Dáýren Babamuratov

ALMATY. QazAqparat - «Jastar úni» JQB tóraǵasy, Almaty qalasy Qoǵamdyq keńesiniń múshesi, Dáýren Babamuratov Qazaqstan Prezıdenti Qasym-Jomart Toqaevtyń úndeýine qatysty pikirin bildirdi, dep habarlaıdy QazAqparat tilshisi.

Onyń aıtýynsha, Prezıdenttiń saılaý kúnin belgileýi ýaqtyly boldy.

"Ásirese sheteldik ınvestorlar, ekonomıkadaǵy iri oıynshylar ábden turaqtylyqqa úırengen. Elbasynyń naýryz aldyndaǵy halyqqa úndeýinen keıin el abdyrap qalǵany sózsiz. Qalyptasqan jaǵdaıda osy ýaqytqa deıin ekonomıka men halyqaralyq deńgeıdegi Elbasynyń jetistikterin saqtaı otyryp, jańa belesterge umtylý úshin halyqqa da saıası aıqyndyq qajet. Qazir Táýelsiz Qazaqstan buryn ótpegen soqpaqtarmen óz bolashaǵyn aıqyndaýda. Elge birlik, saılaýǵa ádildik, ekonomıkaǵa turaqtylyq qajet. Sol sebepti saılaý naýqanyna barynsha qatysý dál qazir árbirimizdiń mindetimiz",- dedi Dáýren Babamuratov.

Aıta ketý kerek, Aqorda Memleket basshysy Qasym-Jomart Toqaevtyń Qazaqstan Respýblıkasy Prezıdentiniń kezekten tys saılaýyn taǵaıyndaý týraly Jarlyǵyn jarııa etti.

Jarlyqqa sáıkes, Qazaqstan Respýblıkasy Prezıdentiniń kezekten tys saılaýy 2019 jyldyń 9 maýsymynda ótetin boldy.

Óz sózinde Qasym-Jomart Toqaev saılaýdyń ashyq, ádil ótetinine ózi kepildik beretinin aıtty.

«Qazaqstan - demokratııalyq memleket. Prezıdent halyqtyń tańdaýymen saılanady. Men, Memleket basshysy retinde, saılaýdyń taza, ashyq ári ádil ótýine kepildik beremin! Bul - meniń berik ustanymym! Aldymyzda zor mindetter tur. Men halqymyzǵa, ıaǵnı Sizderge senemin», - dedi Qasym-Jomart Toqaev.