Halyqqa qajet kómirdiń 70 paıyzdan astamy temirjol tuıyǵyna jetkizildi – mınıstrlik

NUR-SULTAN. QazAqparat – Ortalyq kommýnıkatsııalar qyzmetinde ótken brıfıngide QR Indýstrııa jáne ınfraqurylymdyq damý mınıstrliginiń ındýstrııalyq damý komıteti qara metallýrgııa basqarmasynyń basshysy Janat Igisinov halyqqa qajet kómirdiń qansha paıyzy temirjol tuıyqtaryna jetkizilgenin aıtty, dep habarlaıdy QazAqparat tilshisi.

«Áriptesim aıtqandaı, óndiriletin kómirdiń 10 paıyzy bırjaǵa tússe, qalǵan 90 paıyzy ózara kelisimshart boıynsha energetıka salasyna, óndiris oryndaryna, kommýnaldyq-turmystyq qajettilikterge, halyqqa baǵyttalady. Sandarǵa súıensek, ákimdikterdiń bergen aqparaty boıynsha bıylǵy qajettilik 9,2 mln tonnany quraıdy. Onyń ishinde kommýnaldyq-turmystyq qajettilikke 2,8 mln tonna kómir kerek. Halyqqa arnalǵan kómirdiń mólsheri – 6,4 mln tonna», - degen mınıstrlik ókili bul sandar jergilikti ákimdikterdiń aqparaty negizinde alynǵan atap ótti.

«Ár oblys óz qajettiligin berip otyrdy. Biz sol boıynsha jospar qurdyq. Halyqqa jóneltilgen kómirdiń oryndalýy 71,2 paıyz bolyp otyr. Al kommýnaldyq-turmystyq qajettilike arnalǵan kómirdiń oryndalýy - 92,5 paıyz. Aqmola, Shyǵys Qazaqstan oblystary men Shymkent qalasy kommýnaldyq-turmystyq qajettilikke arnalǵan kómirdiń mólsherin tolyq oryndady. Al Aqmola oblysy halyqqa qajet kómirdi tolyq oryndap otyr. Basqa óńirlerge kelsek, olardyń kórsetkishteri 70-ten 96 paıyzǵa deıin. Bizdiń paıymdaýymyzsha, kelesi aıdyń ortasyna qaraı jalpy qamtamasyz etý 100 paıyzǵa jetedi», - dedi Janat Igisinov.