Halyqarlyq valıýta qory koronavırýspen kúreske 50 mlrd eýro bóledi
Bul týraly HVQ basqarýshy dırektory Krıstalına Georgıeva CNBC-ge bergen suhbatynda aıtty, dep habarlaıdy QazAqparat tilshisi.
Ol aqshany alý úshin elderge HVQ-men birge júzege asyrylǵan baǵdarlama bolýy mindetti emes ekenin, al bólingen qarajattyń 10 mıllıard dollary qordyń jedeldetilgen nesıeleý mehanızmi arqyly kedeı elderge paıyzsyz qaryz túrinde beriletinin aıtty.
«Bizdiń qazir istep jatqan jumysymyz - ár eldiń qarjylyq qajettilikterin taldaý jáne osy resýrstar týraly biletinine kóz jetkizý úshin osy eldermen ózara is-qımyl jasaý», - dedi Georgıeva amerıkalyq bıznes arnasyna bergen suhbatynda.
«Sonymen, biz ózara árekettesýdiń alǵashqy satysynda turmyz. Biraq suranys túsken kezde biz tez áreket etetinimizge sendire alamyn».
HVQ basshysy buǵan deıin baspasóz konferentsııasy barysynda «jahandyq ósim 2020 jyly ótken jylǵa qaraǵanda tómen bolatynyn, biraq qanshalyqty túsetinin jáne áseri qansha ýaqytqa sozylatynyn boljaý áli qıyn» ekenin aıtqan bolatyn.
HVQ sharalary álem boıynsha halyqaralyq qarjy mekemeleri men ortalyq bankterdiń tez taraıtyn aýrýdyń ekonomıkalyq zardaptaryna qatysty qaýipterdi eńserý boıynsha sońǵy is- qımyldarǵa aınaldy.
Seısenbide AQSh Federaldy rezervtik júıesi paıyzdyq mólsherlemeni jarty paıyzǵa tómendetetinin málimdedi, al Dúnıejúzilik bank vırýspen kúresetin elderge dereý 12 mlrd dollar qarjy bólýge ýáde berdi.
Tımýr Dıýsekeev