Halyqaralyq júk tasymalyna ruqsat blankilerin berýdiń avtomattandyrylǵan júıesi iske qosyldy
Kóliktik baqylaý komıtetiniń tóraǵasy Baqyt Ábishevtiń aıtýynsha, atalmysh júıe ilki rejimde Shyǵys Qazaqstan men Almaty oblystarynda jáne Astana men Almaty qalalarynda synaqtan ótkiziledi.
«Atalǵan baǵdarlama ruqsat qujatty resimdeý kezinde tasymaldaýshy men kóliktik baqylaý ınspektsııasy qyzmetkerleriniń tikeleı baılanysyn boldyrmaıdy. Sondyqtan sybaılas jemqorlyqtyń aldyn alyp, qyzmet kórsetý ýaqytyn azaıtýǵa múmkindik beredi. Sonymen qatar, arnaıy jasalǵan formýla júk tasymaldaýshynyń ózine qajetti blankiden artyq blank alýyna jol bermeıdi», - dep atap ótti B. Ábishev.
Onyń aıtýynsha, búginde elektrondyq júıe arqyly elimizdiń júk tasymaldaýshylaryna 1300-den astam blank berilgen.
«Bir blankiniń quny 3 AEK, ıaǵnı shamamen 5 myń teńge. Endi blank alý úshin «elektrondyq úkimet» arqyly ótinish berip, daıyn bolǵan kezde ony kez kelgen HQKO-dan alyp ketýge bolady. Atalmysh blankiler joǵaryda atalǵan 4 aımaqqa Qytaı elinen taýar tasýǵa asa qajet bolyp otyr», - dedi B. Ábishev.