Halyqaralyq jeńil atletıka federatsııasy Olımpıadaǵa irikteý týrnırlerin ýaqytsha toqtatty

NUR-SULTAN. QazAqparat -Halyqaralyq jeńil atletıka federatsııasy 2020 jyldyń 6 sáýiri men 30 qarashasy aralyǵynda ótetin Olımpıadaǵa irikteý týrnırlerin toqtatty. Bul týraly sheshim Sportshylar komıssııasy jáne aımaqtyq uıym prezıdentterimen kelisilgen soń qabyldandy, dep habarlaıdy Olympic.kz.

Osy ýaqyt aralyǵynda qandaı da bir jarystarda tirkelgen nátıjeler Tokıo-2020 oıyndaryna upaı bermeıdi jáne álemdik reıtıngterge enbeıdi. Álemdegi jaǵdaı rettelgen soń Olımpıadaǵa irikteý týrnıri 2020 jyldyń 1 jeltoqsanynan bastalyp, 2021 jylǵy Olımpıada oıyndaryna deıin jalǵasady.

«Men osyndaı qıyn kezeńde jumys atqarǵan barshańyzǵa rahmet aıtamyn. Olımpıadaǵa irikteý týrnıriniń ýaqytsha toqtatylýy sportshylardyń jańadan kúsh jınaýyna kómektesedi. Qazir bar álem shekarasyn qymtap jatqan shaqta týrnır ótkizý qıyn», - deıdi federatsııa basshysy Sebastıan Koe.