Halyqaralyq «Jaıdarman» oıynynda Qyrǵyzstannyń «Pozıtıv» quramasy bas júldege ıe boldy

  ASTANA. QazAqparat - Elordanyń «Kongress-holl» zalynda ótken halyqaralyq «Jaıdarman» oıyny astanalyqtarǵa umytylmas kesh syılady. Elimizdiń túkpir-túkpirinen kelgen KVN-shilermen birge saıysqa RF Tatarstan, Bashqurtstan jáne Qyrǵyzstan komandalary qatysty, dep habarlaıdy «QazAqparat» HAA tilshisi.

Qazaqstan komandalarymen birge, sheteldik meımandardyń qazaq tilinde óner kórsetýi kórermenderdiń zor yqylasyna ıe boldy. «Jaıdarman» oıynynda Óskemennen «Altaı», Qostanaıdan «Arý.kz», uıǵyr ultynyń «Laǵman.kom», Bashqurtstannyń «Ýfa» quramasy men Ózbekstan KVN-shileri, Qyrǵyzstannyń «Pozıtıv», Almaty oblysynyń «Jetisý», Qazaqstannyń namysyn qorǵaǵan «Qazaq jigitteri», Tatarstannyń «Qazan» quramasy men Ońtústik Qazaqstan quramasy ózara synǵa tústi.
 

 

Alǵash bolyp Óskemennen kelgen «Altaı» quramasy oıyndy bastasa, budan keıin shyqqan uıǵyr ultynyń «Laǵman.kom» komandasy jınalǵan jurtshylyqty kúlkige qaryq qyldy. Qazaq tiline jetik oınap bergen uıǵyr KVN-shileriniń óneri údeden shyǵa bildi. Budan keıingi tatar, qyrǵyz, bashqurt aǵaıyndardyń oıyny da qazaqstandyq komandalardan kem túse qoıǵan joq. Bul tusta komandalardyń erekshe daıyndyqpen kelgenin atap ótken jón.

10 komandanyń tartysty oıynynyń qorytyndysy boıynsha úshinshi oryndy (150 myń teńge) Ońtústik Qazaqstan oblysy men Qostanaı quramasynyń «Arý.kz» komandasy, ekinshi oryndy (300 myń teńge) Bashqurtstan quramasy ıelendi. Júldeli birinshi oryndy (350 myń teńge) Tatarstan quramasy jeńip alsa, bas júlde ( 500 myń teńge) Qyrǵyzstannyń «Pozıtıv» quramasynyń enshisinde ketti.
 

«Qadirli qaýym! Jańa ǵana qazylar alqasymen aqyldastyq. Kishkene sheginis jasaǵym keledi. Esen Eleýkenniń osy bastamasyn estip, birden qoldaý bildirdik, qýandyq. Ózderińiz biletindeı, Elbasynyń bastamasymen ashylǵan Túrki akademııasy bar. Jastardyń tilimen halyqtardyń mádenıetin, dástúrin baılanystyrýǵa múmkindik týyp otyr eken. Endeshe, qazylar alqasymen aqyldasa kele, Uıǵyr jáne Ózbek komandalaryna Túrki akademııasynyń atynan 250 myń teńgeden arnaıy syılyq tapsyramyz», - dedi qazylar alqasynyń múshesi Darhan Qydyráli.

Oıyn sońynda jeńimpaz komandalardyń barlyǵyna alǵys hattar men júldeleri tabys etildi.

«Kórshi aqysy túgendelgendeı sekildi búgin. Meniń oıymsha, «Barmysyń, baýyrym» baǵdarlamasynyń rólin búgin «Jaıdarman» atqaryp bergen sekildi. «Jaıdarman» týystarymyzdy taýyp berdi. Bárimiz de bir anadan týǵanbyz. Álemdi mahabbat qutqarady dep jatady ǵoı. Al men álemdi dostyq qutqarady der edim. Dostyǵymyz arta bersin», - dedi qazylar alqasynyń múshesi, «QAZAQ RADIOLARY» mekemesiniń basshysy Mádı Manatbek.