Halyqaralyq valıýta qory 2023 jyly álemdik ekonomıka boljamyn nasharlatpaıdy

ASTANA. QazAqparat – 2023 aýyr jyl bolady, biraq adamdarda jumys barda ekonomıka quldyramaıdy. Boljamdar aryqaraı tómendemeıdi. Halyqaralyq valıýta qorynyń (HVQ) dırektory Krıstalına Georgıeva osylaı dep paıymdady, dep habarlaıdy QazAqparat Deutsche Welle-ge silteme jasap.

Álemdik ekonomıkadaǵy qıyn kezeń jalǵasyp jatqanyna qaramastan, Halyqaralyq valıýta qory (HVQ) 2023 jyly jahandyq ekonomıka ósimi (qazir 2,7%) týraly boljamdardy kezekti márte tómendetpek emes.

Krıstalına Georgıevanyń aıtýynsha, 2023 jyl álemdik ekonomıka úshin kezekti qıyn jyl bolady jáne ınflıatsııany jeńý múmkin bolmaıdy, alaıda eger kútpegen oqıǵalar bolmasa, boljamdy nasharlatýdyń qajeti týyndamaıdy.

HVQ basshysy qazirgi álem daǵdarystarǵa kóbirek beıim ekenin jáne álemdik qaýymdastyq eń kútpegen táýekelderge, atap aıtqanda klımattyq apattar men kúshti kıbershabýyldarǵa daıyn bolýy kerek ekenin atap ótti. Sonymen qatar, munaı baǵasy týraly alańdaýshylyq aqtalmaǵanyn jáne eńbek naryǵy turaqtylyqty kórsetetinine toqtaldy.

«Eńbek naryǵynyń turaqtylyǵy – jaǵymdy jańalyq. Adamdardyń jumysy barda, olar baǵanyń qymbattyǵyna qaramastan aqsha jumsaı beredi... Bul ekonomıkaǵa kómektesti», - dep keltiredi Reuters agenttigi Georgıevanyń sózin.

Buǵan deıin, 11 qazanda HVQ 2023 jyly jahandyq ekonomıkanyń ósý boljamyn 2,9-dan 2,7%-ǵa deıin tómendetti.

«Qysqasha aıtqanda, qıyndyq áli alda, al adamdar 2023 jyldy retsessııa retinde qabyldaıdy», - dep atap ótken edi sol kezde HVQ Zertteý departamentiniń dırektory Per-Olıve Gýrınsh.