Halyqaralyq Túrki akademııasynyń baıqaýshylary referendým ýchaskelerin aralap júr

NUR-SULTAN. QazAqparat – Halyqaralyq Túrki akademııasy Qazaqstandaǵy referendýmdy joǵary qyzyǵýshylyqpen baqylap otyr. Bul týraly Halyqaralyq Túrki akademııasynyń vıtse-prezıdenti Fızýlı Madjıdlı aıtty, dep habarlaıdy QazAqparat tilshisi.

«Biz búgin saǵat 7-den bastap saılaý ýchaskelerinde boldyq. Saǵat 11-ge deıin 9 referendým ýchaskesin aralap kórdik. Budan keıin de jumysymyzdy jalǵastyramyz. Qazirgi tańda halyqtyń referendýmǵa degen qyzyǵýshylyǵy joǵary dep oılaımyz. Biz buǵan kýá bolyp, baıqap otyrmyz. Odan bólek, saılaý ýchaskelerinde Exit Poll toptaryn, basqa uıymdardyń baqylaý múshelerin de kórdik. Bizdiń oıymyzsha, Ortalyq saılaý komıssııasy jáne Qazaqstan Respýblıkasynyń basqa da ýákiletti memlekettik uıymdary barlyq normalardyń múltiksiz saqtalýyn qamtamasyz etýde», - dedi F. Madjıdlı Nur-Sultanda ótken baspasóz máslıhatynda.

Spıker Halyqaralyq Túrki akademııasynyń túrki álemindegi gýmanıtarlyq jáne ǵylymı yntymaqtastyqty úılestiretinin atap ótti.

«Osy sebepti men túrki áleminiń akademııalyq qaýymdastyǵy Qazaqstandaǵy referendýmdy joǵary qyzyǵýshylyqpen baqylap otyratynyn aıta alamyn. Qazirgi geosaıası turaqsyzdyq kezinde Túrki elderiniń birligi men yntymaqtastyǵy óte myqty bolýy kerek dep sanaımyz. Biz baqylaý mıssııamyzdy kúni boıy jalǵastyramyz jáne Qazaqstanda turaqty jaǵdaıdy kóremiz dep úmittenemiz», - dedi F.Madjıdlı.

Sonymen birge F. Madjıdlı saılaý ýchaskelerindegi án-kúı oınap, baýyrsaq pen táttiler taratylyp jatqan qonaqjaılyq pen merekelik atmosferany atap ótti.

Al akademııanyń aǵa sarapshysy Tımýr Kozyrevtiń aıtýynsha, tańǵy saǵat 9-da halyqtyń 3,5% daýys berse, saǵat 10-da bul kórsetkish shamamen 20% jetken. Bul daýys berýdiń joǵary dınamıkasyn aıǵaqtaıdy.

Aıta keteıik, búgin elimizde respýblıkalyq referendým ótip jatyr. Referendým barysynda el turǵyndary Konstıtýtsııamyzdyń 33 babyna 56 ózgeris engizý máselesine qatysty óz daýystaryn beredi.

Referendýmǵa qatysý quqyǵy bar azamattardyń tiziminde 11 mln 722 myń 536 adam bar. Sonymen qatar QR Syrtqy ister mınıstrligi 52 shet memlekettegi Elshilikterimizdiń janynan 65 ýchaskelik referendým komıssııasyn qurdy. Olarda shetelde júrgen Qazaqstannyń shamamen 11 350 azamaty daýys bere alady.

Osydan týra bir aı buryn QR Prezıdenti Qasym-Jomart Toqaev 5 maýsymda respýblıkalyq referendým ótkizý týraly Jarlyqqa qol qoıǵan edi.