Halyqaralyq sarapshylar Túrkistannyń ınvestıtsııalyq áleýetin talqylaıdy

ASTANA. QazAqparat - 28 qyrkúıekte Túrkistan qalasynda «Ejelgi Túrkistan - jańa múmkindikter» atty alǵashqy halyqaralyq ınvestıtsııalyq-týrıstik forým ótedi, dep habarlaıdy QazAqparat Túrkistan oblysy ákimdigine silteme jasap. 

2018 jyldyń 19 maýsymynda Memleket basshysy Túrkistan qalasyn oblystyq ortalyqqa aınaldyrý týraly Jarlyqqa qol qoıǵan edi. Bul ózgerister tutas óńirdiń qarqyndy damýyna serpin berdi. 

«Bul forýmdy otandyq bıznestegi biregeı oqıǵa dep atýǵa bolady. Onyń negizgi taqyryptary logıstıka, týrızm, AÓK damytýǵa arnalady. Dál osy forýmda Túrkistan oblysynyń qalaı damıtyny jáne óńir aldynda qandaı ekonomıkalyq máseleler turǵany talqylanady. Investıtsııalyq blok boıynsha forýmǵa 250-den astam sheteldik qonaq keledi, olardyń arasynda jeke ınvestorlar, halyqaralyq transulttyq kompanııalardyń ókilderi, ınvestıtsııalyq qorlardyń, qarjy ınstıtýttary men bankterdiń basshylary bar», - dedi Túrkistan oblysy ákiminiń orynbasary Erbol Tasjúrekov. 

Ákimdiktiń habarlaýynsha, týrızm - Túrkistan oblysyna ınvestıtsııa tartýdyń negizgi jáne mańyzdy baǵyttarynyń biri. Bul perspektıvalyq salaǵa ınvestıtsııanyń aıtarlyqtaı kólemin baǵyttaý kózdelip otyr. 2017 jyly Túrkistan qalasyna 1,2 mln adam kelgen, bul kórsetkish ótken jylǵy kezeńmen salystyrǵanda 57,2%-ke kóbirek.

Al 2018 jyldyń alǵashqy alty aıynda qalaǵa qydyryp kelýshiler sany 700 myń adamnan asqan, bul da 2017 jyldyń alǵashqy jartyjyldyǵymen salystyrǵanda 60%-ke ulǵaıǵan.