Halyqaralyq reıtıng agenttikteri de Qazaqstannyń ınvestıtsııalyq áleýetin rastady

ASTANA. QazAqparat – Halyqaralyq reıtıng agenttikteri de Qazaqstannyń ınvestıtsııalyq áleýetin rastady. Bul týraly Sheteldik ınvestorlar keńesinde Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Jetkizý tizbeginiń buzylýy, ınflıatsııanyń ósýi jáne saýda-sattyq shekteýleri jahandyq ekonomıkanyń damýyna aıtarlyqtaı kedergi keltirip otyr. Osyǵan qaramastan Qazaqstan syrtqy jaǵdaılarǵa sátti beıimdelip úlgerdi dep senimdi túrde aıta alamyz. Tórt aıda ekonomıkanyń naqty ósimi 5 paıyzdy qurady. Bul buǵan deıin boljanǵan ortasha álemdik kórsetkishten úsh ese kóp», - dedi Memleket basshysy.

Prezıdent ekonomıkamyzdyń barlyq negizgi sektorynda oń dınamıka baıqalatyndyǵyn aıtty.

«Byltyr biz shetelden 28 mıllıard dollar kóleminde ınvestıtsııa tarttyq. Bul – rekordtyq kórsetkish. Bir aıta keterlik jaıt, sheteldik ınvestorlar shıkizattyq emes sektorǵa aıryqsha qyzyǵýshylyq tanytady. Halyqaralyq reıtıng agenttikteri de Qazaqstannyń ınvestıtsııalyq áleýetin rastady. Búkil álemde protektsıonızmniń beleń alýyna qaramastan, ashyq naryqtyq ekonomıkasy bar el retinde óz pozıtsııamyzdy nyǵaıta tústik. Syrtqy saýda aınalymy 32 paıyzǵa ósip,134 mıllıard dollarǵa jetti», - dedi Qasym-Jomart Toqaev.