Halyqaralyq olımpıadalarda jeńimpaz atanǵan oqýshylar 73 mln teńgeden astam syıaqy aldy
Baspasóz qyzmetiniń málimetterine qaraǵanda, qazaqstandyq oqýshylar olımpıadalarǵa qatysý tarıhynda alǵash ret aqshalaı syıaqyǵa ıe boldy. Bul Prezıdent Qasym-Jomart Toqaevtyń daryndy balalardy yntalandyrý jónindegi tapsyrmasynyń arqasynda múmkin bolyp otyr. Sondaı-aq 27 medal ıegeri elimizdiń joǵary oqý oryndarynda tegin oqýǵa múmkindik alady.
Oqýshylar bilimderiniń arqasynda tapqan syıaqyny qalaı jumsaýdy josparlap otyrǵandaryn aıtty.
«Bıyl osyndaı bedeldi olımpıadaǵa alǵash ret qatystym. Oǵan kóp daıyndaldym. Árıne, Oqý-aǵartý mınıstrliginiń el ishinde ótkizgen olımpıadalarynyń arqasynda elimizdi álemdik arenada laıyqty kórsetýge múmkindik aldym. Elimizdi abyroımen tanyta alǵanyma qýanyshtymyn. Geografııadan qatysqan olımpıadada jeńiske jetkenim úshin alǵan aqshamnyń bir bóligin depozıtke salýdy josparlap otyrmyn.
Qalǵanyn ata-anama beremin. Mundaı aqshalaı marapattar bizge úlken ynta-jiger, motıvatsııa beredi, kelesi jyly báseke budan da joǵary bolatynyna senimdimin. Aldaǵy jyly osy olımpıadaǵa taǵy da qatysqym keledi», - dedi geografııadan halyqaralyq olımpıadanyń (IGeO) altyn júldegeri Sanjar Hamıtov.
Qalǵan jeńimpazdar da alǵan júldelerin depozıtke salyp, ata-analaryna berdi. Sonymen qatar syılyqtar satyp aldy.
Memleket basshysynyń tapsyrmasyn oryndaý aıasynda Oqý-aǵartý mınıstrligi halyqaralyq pándik olımpıadalardyń jeńimpazdaryna 1,5 mln-nan 4,5 mln teńgege deıin syıaqy taǵaıyndaǵan bolatyn. Buǵan deıin Oqý- aǵartý mınıstri Ashat Aımaǵambetov aıtqandaı, bıyl tizimge 7 olımpıada kirse, kelesi jyly ol taǵy 7 olımpıadamen tolyǵady.
«2022 jyly ulttyq qurama el qorjynyna 3 altyn, 15 kúmis jáne 9 qola medal ákeldi»,-delingen mınıstrliktiń habarlamasynda.
Foto: gov.kz