Halyqaralyq koalıtsııa Sırııadaǵy lańkester jetekshileriniń birin ustady

AMMAN. QazAqparat – AQSh bastaǵan halyqaralyq koalıtsııa áskeri Sırııada arnaıy operatsııa júrgizý nátıjesinde «Islam memleketi» (Qazaqstanda tyıym salynǵan – red.) lańkestik tobynyń joǵary shendi jetekshisin ustady, dep habarlaıdy QazAqparat tilshisi koalıtsııa málimdemesine silteme jasap.

«Aınymas sheshim» (CJTF-OIR) dep atalatyn halyqaralyq koalıtsııa kúshteri 16 maýsymǵa qaraǵan túni Sırııanyń soltústiginde IM-niń joǵary laýazymdy jetekshisin ustaý úshin lańkestikke qarsy operatsııa júrgizdi.

«Tutqynǵa alynǵan adam – tájirıbeli bomba jasaýshy jáne IM-niń sırııalyq bólimshesindegi joǵary basshylardyń birine aınalǵan jedel deldal», - delingen habarlamada.

Koalıtsııa operatsııanyń sátti ótkenin, beıbit turǵyndardy qosa alǵanda eshkim zardap shekpegenin jarııalady. Sondaı-aq, koalıtsııa kúshterine, sonyń ishinde ushaqtar men basqa da múlikke zııan kelmegenin málimdedi.

«Koalıtsııa kúshteri túpkilikti joıý úshin IM-niń qalǵan músheleri qaıda jasyrynsa da, izdeýdi jalǵastyrady», - dep málimdedi koalıtsııa basshylyǵy.