Halyqaralyq qaýymdastyq Qazaqstandaǵy koronavırýs jaǵdaıynan habardar boldy

NUR-SULTAN. QazAqparat - Densaýlyq saqtaý mınıstrligi halyqaralyq qaýymdastyqty Qazaqstandaǵy COVID-19-ǵa qatysty jaǵdaıdan habardar etti, dep habarlaıdy QazAqparat.

Búgin QR Densaýlyq saqtaý mınıstrligi basshylyǵy bastaǵan qazaqstandyq delegatsııa Dúnıejúzilik densaýlyq saqtaý assambleıasynyń vırtýaldy formattaǵy 73-shi sessııasynyń jumysyna qatysty.

«COVID-19 taralýynyń aldyn alý, epıdemııaǵa qarsy jáne jedel profılaktıkalyq sharalar qabyldaý maqsatynda biz birqatar sharany júzege asyrýdamyz. «Halyq densaýlyǵy jáne densaýlyq saqtaý júıesi týraly» Kodekske zańnamalyq deńgeıde bas memlekettik sanıtar dárigerdiń shekteý is-sharalaryn, onyń ishinde karantındi engizý bóliginde ókilettikterin kúsheıtý boıynsha normalar engizildi, olar barlyq adam úshin mindetti», - dedi onlaın jıynda mınıstrliktiń yntymaqtastyq jáne ıntegratsııa departamentiniń dırektory Gúlnar Muhanova.

Densaýlyq saqtaý mınıstrligi janynan koronavırýs ınfektsııasymen syrqattanýdy boljaý jáne qajetti sharalardy ázirleý jónindegi jumys toby quryldy, ol orta merzimdi jáne qysqa merzimdi boljamdar jasaıdy. Koronavırýs ınfektsııasynyń taralýyna baılanysty epıdemıologııalyq jaǵdaıdy baǵalaý matrıtsasy ázirlendi, onyń kómegimen shekteý sharalaryn kúsheıtý nemese jeńildetý boıynsha sheshimder qabyldanady.

Koronavırýs ınfektsııasynyń taralýyn baqylaý, sondaı-aq indet oshaǵyn ýaqtyly oqshaýlaý úshin Qazaqstan Respýblıkasynda «Covid-19 baqylaý ortalyǵy» jáne «Saqbol» veb-qosymshasy engizildi, QR-kodty skanerleý arqyly qoǵamdyq oryndarǵa kirý, QR aýmaǵyna kelgen jolaýshylarǵa saýalnama júrgizý, «Men úı karantınindemin» degen úsh modýlden turatyn «Zertteu» atty taǵy bir mobıldi qosymsha daıyndalýda.

Infektsııanyń taralýyna jol bermeý maqsatynda Qazaqstan Respýblıkasy memlekettik shekarany ótkizý pýnkterinde sanıtarııalyq-epıdemıologııalyq jáne kóshi-qon baqylaýyn kúsheıtti.

Sonymen qatar, elimiz testileýdiń qoljetimdiligin qamtamasyz etý boıynsha jumysty jalǵastyrýda. Búginde 3,6 mln astam zertteý júrgizildi, aǵymdaǵy qýaty - táýligine 71 myńnan astam test.

Testileý qýatynyń kórsetkishi 100 myń turǵynǵa shaqqanda shilde aıynan bastap 2 esege, 100 myń turǵynǵa shaqqanda 213,0-den 370,0-ge deıin ulǵaıdy.

Karantın sharalarynyń saqtalýyn baqylaý úshin elimizdiń barlyq óńirinde reıd júrgizetin jáne karantın talaptaryn buzǵandardy anyqtaıtyn mobıldi monıtorıng toptary quryldy.

«Osylaısha, Qazaqstanda Covid-19 taralýynyń aldyn alý jáne densaýlyq saqtaý júıesin daıyndaý boıynsha tıisti sharalar qabyldanýda», - dep atap ótti G.Muhanova.

Aıta keteıik, Dúnıejúzilik Densaýlyq saqtaý assambleıasynyń 73-shi sessııasy 2020 jyldyń 14 qarashasyna deıin jalǵasady.