Halyqaralyq baıqaýshy kóppartııalyq júıeniń artyqshylyǵyn atady

ASTANA. QazAqparat – Kóppartııalyq júıe eldiń saıası ómirine enýi tıis. Mundaı pikirdi Lıtva Respýblıkasynyń Seımi tóraǵasynyń orynbasary ıÝlıýs Sabataýskas bildirdi, dep habarlaıdy QazAqparat tilshisi.

«Biz Qazaqstandaǵy referendýmnan keıin demokratııalyq reformalar iske asyrylyp, adamdarda óz ókilderin Parlamentke tikeleı saılaý múmkindigi týǵanyna qýanyshtymyz. Qazir úmitkerler tek partııalyq tizim boıynsha ǵana emes, sonymen qatar bir mandatty okrýgter boıynsha da saılanady. Talapqa saı keletinderdiń bári óz kandıdatýralaryn usyna alady. Biz barǵan okrýgterde úmitkerlerdiń kóp bolǵany qýantady. Endi adamdar partııaǵa emes, tikeleı saılaýshyǵa táýeldi bolady», - dep atap ótti ıÝlıýs Sabataýskas.

Sonymen birge ol bıýlletendegi «barlyǵyna qarsymyn» jolaǵyna qatysty pikir bildirdi.

«Eger saılaýshylar óz daýysyn berýge laıyqty kandıdatty nemese partııany tappasa, bıýlletenderdi búldirýdiń qajeti joq. Sebebi, «barlyǵyna qarsymyn» baǵany bar. Nátıjelerge keletin bolsaq, qorytyndy ekinshi kúni birden shyqpaıdy. Nátıje qansha jáne qandaı partııalardyń saılanatynyna baılanysty bolady. Sońǵy ózgeriske saı, partııalyq tizimder negizinde - 70%, bir mandatty okrýgter boıynsha 30% oryn qarastyrylǵan. Kóppartııalyq júıe eldiń saıası ómirine túpkilikti enýi tıis. Sonda naqty básekelestik bolady. Biraq Parlamenttiń árbir sheshimi adamdardyń pikirine negizdelýi kerek ekenin atap ótken jón», - dep sózin túıindedi baıqaýshy.

Eske salaıyq, búgin Qazaqstanda Májilis pen máslıhat depýtattaryn saılaý ótip jatyr. 18:00-degi jaǵdaı boıynsha saılaýshylardyń 53,11 paıyzy daýys berip úlgerdi.