Halyqaralyq baıqaýshy: Kanada men Qazaqstandaǵy saılaýda úlken aıyrmashylyq joq

ASTANA. QazAqparat – Kanada senatory, Qazaqstan-Kanada parlamentaralyq yntymaqtastyq tobynyń teń tóraǵasy Vıktor Oý Qazaqstandaǵy saılaý protsesi qaǵazdaǵy talaptarǵa sáıkes ótip jatqanyn málim etti, dep habarlaıdy QazAqparat tilshisi.

«Qazaqstandaǵy saılaý týraly pikirlerińizdi estidik. Bul elge saılaý júıesin jetildirý úshin qandaı keńes berer edińizder?» dep surady ulybrıtanııalyq London Post basylymynyń tilshisi Kanada men Meksıkanyń baıqaýshylarynan.

«Bizdiń kórgenimiz boıynsha aıtsaq, bári jaqsy ótip jatyr. Daýys berý protsesi áli jalǵasyp jatyr. Ázirge kórgenimizden málimdelgen protsedýralar is júzinde saqtalyp jatyr. ıAǵnı, qaǵazda jazylǵan dúnıelerge protsedýralar sáıkesedi. Men baıqaýshymyn jáne baıqaý kezinde Kanadada jumys isteıtin júıeden eshqandaı aıyrmashylyq kórmedim», - dedi kanadalyq baıqaýshy.

Sondaı-aq, ol Qazaqstandaǵy saılaýdy óz elindegi úderispen salystyrdy.

«Kanadanyń da demokratııalyq saılaýdy qamtamasyz etetin óz júıesi bar. Ázirshe men sonshalyq úlken aıyrmashylyq kórgen joqpyn. Sizderde bıýlleten bar, ol qupııa toltyrylady. Kimge daýys beretinińizdi qupııa belgileısiz. Sodan keıin baryp ýrnaǵa salasyz. Men bul jerde jaqsy júıe bar dep topshylaımyn», - dedi kanadalyq baıqaýshy.

Búgin elimizdegi 86 ýchaskede daýys berý ózge ýchaskelerden bir saǵat buryn bastaldy.

Ortalyq saılaý komıssııasynyń bergen málimetine súıensek, elimizde daýys berý quqyǵy bar 11 827 277 azamat tirkelgen.

Olar respýblıka aýmaǵynda ornalasqan 10 101 saılaý ýchaskesinde daýys beredi. Al 53 shet memlekettegi 68 ýchaskede 12 527 Qazaqstan azamatyna daýys berý múmkindigi jasalǵan.

Buǵan deıin OSK kezekten tys prezıdent saılaýynyń barysyn 641 halyqaralyq baıqaýshy qadaǵalaıtynyn málim etken edi.