Halyqaralyq baıqaýshy bıýlletendegi «bárine qarsymyn» baǵanyna qatysty pikir bildirdi

ASTANA. QazAqparat – Kavkaz tarıhy ortalyǵynyń dırektory (Ázerbaıjan), baıqaýshy Rızvan Nadjaf oǵly Gýseınov Qazaqstandaǵy saılaý bıýlleteninde jazylǵan «bárine qarsymyn» baǵanyna qatysty pikir bildirdi, dep habarlaıdy QazAqparat tilshisi.

«Tańerteń qaladaǵy biraz saılaý ýchaskesinde boldym. Jalpy, halyqtyń daýys berýge kelýi qarqyny jaqsy jáne túske qaraı budan da joǵary bolady dep oılaımyn. Qazaqstanda saılaý bıýlleteninde «bárine qarsymyn» degen jolaq bar. Osy oraıda kez kelgen saılaýshy tizimdegi úmitkerlerge óziniń qarsylyǵyn aıqyn bildire alady. Bul óz kezeginde demokratııanyń kórsetkishi dep bilemin. Adamdar osy arqyly óz kózqarasyn ashyq kórsetedi. Saılaý qorytyndysy boıynsha «bárine qarsymyn» jolaǵyn belgilegen adamdar sany sarapshylar men áleýmettanýshylar úshin qyzyq bolady dep sanaımyn. Óıtkeni osynyń barlyǵy saılaýaldy baǵdarlamasynyń qanshalyqty tıimdi bolǵanyn kórsetedi», - dedi Rızvan Nadjaf oǵly Gýseınov elordadaǵy Halyqaralyq baıqaýshylarǵa qolǵabys kórsetý ortalyǵynda ótken brıfıngide.

Óz kezeginde saıasattanýshy, Kavkaz halyqaralyq ýnıversıtetiniń professory (Grýzııa) Vahtang Maısaıa daýys berýge kelip jatqan saılaýshylar qarqyny jaqsy ekenin quptady.

«Tańerteńnen beri 11 saılaý ýchaskesinde boldym. Atap aıtqanda, eleýli kemshilikter baıqalmady», - dedi V. Maısaıa.

Budan buryn habarlanǵandaı, búgin Qazaqstanda Májilis pen máslıhat depýtattaryn saılaý bastaldy.