Halyqaralyq Armııa oıyndaryna qatysatyn qazaqstandyq sarbazdar Reseıge attandy

NUR-SULTAN. QazAqparat – Halyqaralyq Armııa oıyndary sheńberinde «Attar marafony» konkýrsyna qatysatyn Qazaqstan áskerı qyzmetshileriniń komandasy Reseıge attandy, dep habarlaıdy dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Jarys Kyzyl qalasynda (Tyva Respýblıkasy) ótedi.

Osy konkýrsqa áskerı qyzmetshiler bes aı daıyndaldy. Komandanyń negizgi quramy taý-ormanshylyq polk áskerı qyzmetshileri qatarynan qurylǵan. Olar aqpan men maýsymda ótken birneshe irikteý kezeńiniń nátıjeleri boıynsha anaǵurlym daıarlanǵan mamandar qatarynan iriktelip alyndy. Áskerı qyzmetshilerdi jibergenge deıin olardy jattyqtyrý osy bólimsheniń bazasynda ótti.

«Qarqyndy jattyǵýlar kezinde komanda óz nátıjelerin jaqsarta tústi. Bul óz kezeginde bizge júldeli oryndarǵa ıe bolýǵa múmkindik beredi», – dep atap ótti «Ońtústik» óńirlik qolbasshylyǵy áskerleri qolbasshysynyń jaýyngerlik daıarlyq jónindegi orynbasary polkovnık Dáýren Hamıtov.

Qazaqstan komandasynyń Reseıge keter aldyndaǵy sońǵy daıarlyq kezeńi saptyq baıqaý boldy. Ony Qorǵanys mınıstriniń keńesshisi general-maıor Ádilbek Aldabergenov ótkizdi.

– Sizder jarysta óz kásibı sheberligińizdi kórsete otyryp, eń úzdik nátıjege qol jetkizýge, qarsylastarymyzǵa laıyqty básekeles bolýǵa tıissizder. Sizderdiń árbir jetistigińizge qarap, bizdiń armııamyzdy, bizdiń elimizdi baǵalaıtyn bolady, – dedi ol.

Halyqaralyq konkýrsta Qazaqstan áskerı qyzmetshileriniń qarsylastary Zımbabve, Iran, Mońǵolııa, Reseı jáne Ózbekstan komandalary bolady.

«Attar marafony» konkýrsyna komandalar jergilikti jermen tanysý jáne beıimdelý úshin, eń bastysy, jattyǵýlar ótkizý úshin erterek barady. Óıtkeni jarys sharttary boıynsha qatysýshylarǵa attardy qabyldaýshy tarap beredi. Qatysýshylarǵa tek óziniń at-ábzelin paıdalanýǵa ruqsat etilgen.

«Attar marafony» komandasymen bir ýaqytta «Desanttyq vzvod» jáne «Elbrýs sheńberi» konkýrstarynyń qatysýshylary da oıyn ótetin jerlerge ketti.