Halyqaralyq armııa oıyndary: Qazaqstan «Beıbitshilik jaýyngeri» saıysynda 1-oryn aldy
Dılıjan polıgonynda (Armenııa) qazaqstandyq komanda (aǵa serjanttar Darhan Aslan, Bektóre Nazashov, Turar Tilegenov jáne qatardaǵy jaýynger Nazıra Álbosynova) Armenııa, Belarýs jáne Reseı elinen qatysqan qarsylastaryn basyp ozdy.
Saıystyń nátıjesi «Ratnık» qorytyndy kezeńinde sheshildi. Qazaqstandyq áskerı qyzmetshiler erler arasyndaǵy áskerı-qoldanbaly pánder jarysynda da jeńiske jetti. Qatardaǵy jaýynger Nazıra Álbosynova áskerı-medıtsınalyq jarysta úzdik nátıje kórsetip, atys daıarlyǵynyń jattyǵýlaryn sátti oryndap shyqty. Bul kezeńdegi jeńis qazaqstandyq komandaǵa baıqaý tuǵyrynyń joǵary satysyna kóterilýge múmkindik berdi. Jalpykomandalyq esepte ekinshi oryndy Reseı áskerı qyzmetshileri enshilep, Belarýs eliniń ókilderi úzdik úshtikke endi.
Ázerbaıjan Respýblıkasyndaǵy áskerı teńizshilerdiń «Teńiz kýbogi» baıqaýynyń saıystary da aıaqtaldy. Barlyq kezeńderdiń qorytyndysy boıynsha qazaqstandyq komanda 2-orynda tur. Birinshi oryndy Ázerbaıjan men Reseıdiń áskerı qyzmetshileri ózara bólisti.
Kabardıno-Balkarııada ótip jatqan «Elbrýs sheńberi» baıqaýynda qazaqstandyq áskerı qyzmetshiler jattyǵýlardy oryndaýdan Reseı men Ózbekstan jaýyngerlerinen sál artta qalyp, 3-orynǵa turaqtady. Tórtinshi jáne besinshi oryndardy Qytaı men Úndistan komandalary ıelendi. Baıqaý nátıjeleri komandalar arasyndaǵy sońǵy jarys – Elbrýs shyńyna shyǵýdan soń anyqtalady.
Máskeý mańyndaǵy «Alabıno» polıgonynda qazaqstandyq tankıster «Tank bıatlony» baıqaýynyń aqtyq máresine ótpeı qaldy. Qazaqstan quramasy márege jeter aldynda Qytaı komandasyna jol berip, halyqaralyq armııa oıyndarynyń jabylý kúni ótetin fınalǵa shyqpaıtyn boldy.
Buǵan deıin Qazaqstan áskerıleri «Artıllerııadan oq atý sheberleri», «Merıdıan» jáne «Taktıkalyq mergen» baıqaýlarynda jeńiske jetken edi.
Foto: QR Qorǵanys mınıstrliginiń baspasóz qyzmeti