Halyq úshin komýnaldyq tarıfter kúrt óspeıdi –Tabıǵı monopolııalar komıteti

NUR-SULTAN. QazAqparat – QR Ulttyq ekonomıka mınıstrliginiń Tabıǵı monopolııalardy retteý komıteti tóraǵasynyń mindetin atqarýshysy Ashat Japsarbaı byltyrǵy tamyzdan beri tarıfterdiń qalaı ózgergeni týraly málimet berdi, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken brıfıngide BAQ ókilderi bir jylda komýnaldyq tarıfterdiń qalaı ózgergeni týraly surady.

«Jalpy Qazaqstan boıynsha 1200-den astam tabıǵı monopolııa sýbektisi bar. Árbir tabıǵı monopolııa sýbektisiniń 2-3 túrli tarıfi bolady. Onyń bári ekonomıkalyq jaǵynan saralanyp, qarastyrylady. Óńirler boıynsha aıtsaq, mysaly sý burý, sýmen qamsyzdandyrý boıynsha tarıf byltyrdan beri ósken joq. Kerisinshe keıbir óńirlerde tarıfter tústi. Sonymen qatar, jylý boıynsha tarfıter ózgergen joq. Tarıftiń ósýine kóbinese strategııalyq taýarlardyń qymbattaýy áser etedi. Sondyqtan energııa óndirýshi uıymdardyń tarıfiniń ósýi tabıǵı monopolııa sýbetilerine mýltıplıkatıvti áser etip otyr», - dedi komıtet tóraǵasynyń mindetin atqarýshy.

Sondaı-aq, ol óńirlerdegi tabıǵı monopolııa sýbektilerinen tarıfti kóterý týraly ótinishter túsip jatqanyn atady.

«Óńirler boıynsha tabıǵı monopolııa sýbektileri tarıf kóterý týraly ótinish joldaǵan. Ol ótinish qaralyp jatyr. Biraq biz halyq úshin tarıfti kótermeýge tyrysamyz. Bizdiń oıymyzsha, ol halyqqa kóp áser etpeıdi. Byltyrǵy tótenshe jaǵdaı kezindegi tarıftiń túsýin eske alatyn bolsaq, tabıǵı monopolııa sbýektileriniń 80 paıyzdan astamy tarıfti sol deńgeıden kótergen joq. Biz osy baǵytta jumysty jalǵastyryp jatyrmyz. Halyq úshin tarıfter kúrt óspeıdi. Biz ony mindetti túrde baqylaımyz», - dedi komıtet basshysy.