Halyq tutynatyn azyq-túlik óndirýshiler úshin energııaǵa saralanǵan tarıf engizilýi múmkin

NUR-SULTAN. QazAqparat – Búgin elordada QR Aýyl sharýashylyǵy mınıstri Erbol Qarashókeevpen kezdesken elordalyq kásipkerlerdiń biri áleýmettik mańyzy bar azyq-túlik óndiretin kásiporyndar úshin elektr energııasyna saralanǵan tarıf engizýdi usyndy, dep habarlaıdy QazAqparat tilshisi.

«Aı saıyn elektr energııasyna 7-8 mln teńge tóleımiz. Al bul nanymyzdyń ózindik qunyna áser etedi. Naryqta júrgenimizge 20 jyl boldy. Erterekte kúndizgi jáne túngi tarıf degen bolatyn. Túngi tarıf birshama arzan. Óıtkeni, halyq uıqyǵa ketedi, elektr energııasy jetkilikti. Al bizdiń óndirisimiz táýlik boıy júredi. Saýda núktelerin nansyz qaldyra almaımyz. Áleýmettik mańyzy bar azyq-túlik óndirýshiler úshin eki tarıftik tólem júıesine kóshýge nelikten bolmasqa?! Biz ystyq nan tańerteńgi 6-da daıyn bolýy úshin negizinen túngi ýaqytta jumys isteımiz», - dedi «Astanalyq nan» JShS-niń ókili.

Erbol Qarashókeevtiń atap ótýinshe, mundaı problemamen mınıstrlikke tek naýbaıshylar ǵana emes, sonymen qatar óndirisi aýyl sharýashylyǵymen baılanysty ózge de kásiporyndar jıi júginedi. Osy rette ol bul máseleni aldaǵy ýaqytta kóteretindigin aıtty.

«Usynysyńyz kóńilge qonyp otyr. Eger áleýmettik mańyzy bar azyq-túlik shyǵaratyn kásiporyndardyń tizimin jasaıtyn bolsaq, onda bizdi bul baǵytta qoldap qalar», - dedi mınıstr.