Halyq sanaǵynyń nátıjesi qashan jarııalanady

NUR-SULTAN. QazAqparat – Ulttyq statıstıka bıýrosynyń basshysy Nurbolat Aıdapkelov ulttyq halyq sanaǵynyń nátıjesi qashan jarııalanatynyn aıtty, dep habarlaıdy QazAqparat tilshisi.

«Halyqty aqparattandyrýdyń barlyq arnalarynda ulttyq sanaqty jarııa etý úshin aýqymdy buqaralyq-túsindirý jumystary júrgizildi. Búkil el boıynsha halyq sanaǵyn ótkizýge arnalǵan 3 500-den astam arnaıy pýnkt jumys istedi.

1446 nómiri boıynsha arnaıy call-ortalyǵy táýlik boıy jumys istedi», - dedi N. Aıdapkelov Úkimettiń búgingi otyrysynda.

Spıkerdiń aıtýynsha, el turǵyndarynan 500 myńnan astam ótinish túsken. Al respondentterge 25 mln astam SMS-habarlama jiberilgen.

«Bıýro alynǵan derekterdi óńdeýge kiristi jáne aldyn ala derekterdi bıylǵy jeltoqsan aıynda usynýdy josparlap otyr. Іs-sharalar josparyna sáıkes, sanaqtyń qysqasha qorytyndylary 2022 jyldyń ortasyna josparlanǵan jáne 2023 jyldyń 1-toqsanynda sanaqtyń tolyq qorytyndysyn jarııalaýdy josparlap otyrmyz», - dedi N. Aıdapkelov.

Aıta keteıik, Qazaqstan Respýblıkasynyń Ulttyq halyq sanaǵy aıaqtaldy. Onlaın saýalnamadan halyqtyń 42,5% ótti, al jappaı aralap shyǵý arqyly 57,5% adam sanaqpen qamtyldy.

Sonymen birge, Premer-Mınıstr qazaqstandyqtarǵa osy mańyzdy naýqanǵa belsendi qatysqan úshin, sondaı-aq Ulttyq statıstıka bıýrosynyń qyzmetkerleri men osy naýqanǵa jumyldyrylǵan azamattarǵa atqarǵan jumysy úshin alǵys bildirdi.