Halyq sanaǵyn jeleý etip jasalatyn alaıaqtyq fakt tirkelgen joq - ІІM

NUR-SULTAN. QazAqparat - Qazaqstandyqtar messendjerde halyq sanaǵyn jeleý etip, beınebaılanys arqyly qońyraý shalyp, adamnyń betin skanerlep, olardyń atyna nesıe alatyn alaıaqtar týraly aýdıojazbamen bólisýde. ІІM baspasóz qyzmeti mundaı faktiler tirkelmegenin habarlady. Bul týraly QazAqparat stopfake.kz saıtyna silteme jasap habarlaıdy.

Onyń aıtýynsha, alaıaqtar beıneqońyraý shalyp, birneshe suraq qoıady, osy ýaqytta adamnyń betin skanerlep, onyń atyna birneshe nesıe alady.
ІІM mundaı faktilerdiń tirkelgeni týraly aqparatty joqqa shyǵardy.

«Qaraǵandy oblysynyń PD ótip jatqan «Qazaqstan Respýblıkasynyń ulttyq halyq sanaǵy – 2021» jeleý etip jasalǵan alaıaqtyq is-áreketter faktileri boıynsha qylmystyq ister tirkelgen joq», – delingen StopFake.kz joldaǵan saýalǵa berilgen jaýapta.

Sonymen qatar, ІІM ókilderi qazaqstandyqtardy qaýipsizdik sharalaryn esten shyǵarmaýǵa shaqyrady.
«Іshki ister mınıstrligi azamattardyń nazaryn bank shottarynyń qorǵalýyn qamtamasyz etý úshin qarapaıym qaýipsizdik sharalaryn saqtaý qajet ekenine aýdarady:
– parolderdi únemi ózgertip otyryńyzdar, ol kúrdeli bolýy tıis;
– tólem júıelerinde bar barlyq qaýipsizdik júıelerin qosý kerek: sms rastaý, IP-meken jaıdy baqylaý, 3D-secure jáne t.
Eger alaıaqtardyń qurbany bolǵanyńyzdy túsinseńiz, birinshi kezekte bankke habarlasyp, alaıaqtyq áreketter nátıjesinde bolǵan aqsha qarajatynyń qozǵalysyna baılanysty barlyq operatsııalardy buǵattaýǵa tyrysyńyz. Alaıaqtarmen júrgizilgen barlyq hat-habarlardy, sondaı-aq ózińizge qatysty jasalǵan qylmysty ashýǵa yqpal etetin aqparatty saqtańyz. Turǵylyqty jeri boıynsha polıtsııa bólimshesine habarlasyńyz.
Sonymen qatar, resmı aqparat kózderine ǵana senińizder» , – dep habarlady vedomstvodan.

Aıta ketsek, 1 qazannan bastap Qazaqstanda halyq sanaǵynyń ekinshi kezeńi bastalady. Onlaın formatta saýalnamadan ózdiginen ótpegenderge suhbat alýshylar keledi.