Halyq sanaǵy: qatysýshylardyń 86 paıyzy smartfon arqyly onlaın jaýap berdi

NUR-SULTAN. QazAqparat – QR Strategııalyq josparlaý jáne reformalar jónindegi agenttiktiń Ulttyq statıstıka bıýrosynyń basshysy Nurbolat Aıdapkelov Ulttyq halyq sanaǵynyń aralyq qorytyndylaryn baıandady, dep habarlaıdy QazAqparat.

«Ulttyq halyq sanaǵynyń bastalǵanyna bir aı boldy. Ózderińiz biletindeı, búginge deıin sanaq tek onlaın rejımde ótti. Bul múmkindik 15 qazanǵa deıin qoljetimdi bolatynyn atap ótkim keledi. Sanaq suraqtaryna jaýap berýdiń birneshe joly bar. Bul sanaq.gov.kz mamandandyrylǵan saıty, E-Gov portaly arqyly, sondaı-aq Aitu mobıldi qosymshasyn paıdalana otyryp avtorızatsııadan ótýge bolady», - dedi N. Aıdapkelov Ortalyq kommýnıkatsııalar qyzmetinde ótken brıfıngide.

1 qazan saǵat 11:00-degi jaǵdaı boıynsha onlaın sanaqtan 6 429 018 adam nemese 33,8% azamat ótti. Atap óterligi, respondentterdiń 86 protsentten astamy smartfon arqyly sanaqtan ótken.

«Sanaqtan onlaın rejımde ótkender sany boıynsha Túrkistan oblysy kósh bastap tur. Óńirdiń 865 myń turǵyny sanaqtan ótkeni týraly habarlama aldy. Almaty oblysynda 705 myń adam tirkelgen. Kóshbasshylar úshtigin Shyǵys Qazaqstan oblysy túıindeıdi. Munda halyq sanaǵynyń suraqtaryna 612 myń adam jaýap berdi. Osy kórsetkish boıynsha Mańǵystaý jáne Soltústik Qazaqstan oblystaryn sońǵy oryndarda. Bul óńirlerde sanaqtan sáıkesinshe 181 024 jáne 155 779 adam ótti», - deıdi spıker.

Al naqty óńirdiń onlaın sanaqpen qamtylǵan halqy boıynsha, Qyzylorda oblysy kósh bastap tur. Munda 48,8 % adam qamtylǵan. Ekinshi orynda Shyǵys Qazaqstan oblysy. Munda bul kórsetkish 45%-ǵa jetken.