Halyq pen kólik eń kóp ótetin «Qordaı» beketi kúrdeli jóndeýden ótpek
Bul týraly Qordaı aýdanynda eki eldiń mınıstrleri basqosqan kezdesýinde aıtyldy, dep habarlaıdy QazAqparat tilshisi.
Atalǵan kezdesýge QR Indýstrııa jáne ınfraqurylymdyq damý mınıstri B.Atamqulov, QR UQK tóraǵasynyń birinshi orynbasary, Shekara qyzmetiniń dırektory D.Dılmanov, QR IIDM Avtomobıl joldary komıtetiniń tóraǵasy S.Barmaqov, Jambyl oblysy ákiminiń orynbasary E.Daýylbaev, sondaı-aq Qyrǵyz Respýblıkasynyń Kólik jáne jol mınıstri J.Beıshenov, Qyrǵyz Respýblıkasy Kólik jáne joldar Mınıstrligi janyndaǵy avtomobıl, sý kóligi baqylaý agenttiginiń dırektory jáne Shekara qyzmetiniń basshylary qatysty.
Jıyn barysynda Qordaı ótkizý pýnkti jóndeý jumysyna jabylǵanǵa deıin Qyrǵyzstan men aradaǵy negizgi shekaralyq baqylaý-ótkizý beketterin jańartý týraly áńgime qozǵaldy.
Sondaı-aq, «Sortóbe» jáne «Aýqatty» avtomobıl ótkizý pýnkteriniń mártebesin ekijaqty ótkizý pýnkterinen «kópjaqty halyqaralyq» ótkizý pýnkterine aýystyrý kózdelip otyrǵandyǵy aıtyldy. ıAǵnı aldaǵy ýaqytta barlyq tranzıttik jol kólikteri osy eki beket arqyly ótýi múmkin. «Qarasý», «Sortóbe», «Aýqatty» baqylaý beketterindegi shekara arqyly ótýshilerge arnalǵan baqylaý kabınalarynyń qataryn kóbeıtý, eki el arasyndaǵy shekara syzyǵynda ornalasqan kópirdi rekonstrýktsııalap, keńeıtý syndy ózekti máseleler de qozǵaldy.
Jóndeý jumystary júrgiziletin kezeńde Qordaı aýdany ákimdigi tarapynan «Qordaı» baqylaý beketinen kúndelikti ótetin azamattar úshin «Qordaı-Qarasý» baǵytynda arnaıy qoǵamdyq kólikter uıymdastyralatyn bolady. Kóterilgen máseleler transporttyq dálizdiń jumysyn keńeıtip, shekaradaǵy kedergilerdi azaıtýǵa septigin tıgizbek.
Osy tusta eki birdeı baqylaý beketterinde halyqaralyq mártebe berilgendikten aýdannyń avtojoldary respýblıkalyq mándegi avtojol bolýy ábden múmkin.
Aıta keteıik, qazirgi tańda eki el arasynda 11 avtokólik ótkizý pýnkti bar. Olardyń beseýi – kópjaqty halyqaralyq, al altaýy – ekijaqty. Ekijaqty ótkizý pýnkteriniń tórteýinen ótetin adamdar men kólikterdiń qarqyny tómen bolǵandyqtan, olar 2010 jyly jabylǵan. Al, qazir jumys istep turǵan jeti ótkizý beketinen jylyna 11 mıllıondaı adam, 1 mıllıon 300 myńdaı jeńil kólik jáne 400 myńnan astam júk kóligi ótedi eken. Al, eki el arasyndaǵy halyq pen kólik eń kóp ótetin pýnkt – Qordaı beketi.