Halyq pen bılikti jaqyndastyratyn portal iske qosyldy

ASTANA. QazAqparat - «Qazaqstan-2050» jalpyulttyq qozǵalysy azamattardyń ıdeıalary men bastamalaryn qoldaýǵa arnalǵan crowd.kz2050.kz ınternet-portalyn iske qosty. Portal árbir azamattyń jergilikti ákimdikke óz jobalaryn usynýyna, talqylaýyna, pikir bildirýine múmkindik beredi, dep habarlaıdy QazAqparat qozǵalystyń baspasóz qyzmetine silteme jasap.

Jergilikti túrǵyndardyń qalany damytýǵa qatysýyn qamtamasyz etý úshin bul joba Batys Qazaqstan oblysynda ilki joba retinde qolǵa alyndy. Turǵyndar ıdeıalaryn oblystyq ákimdik usynǵan ınternet resýrs arqyly joldaı alady. Mundaı joba osy ýaqytqa deıin álemniń iri qalalarynda qolǵa alynyp, óziniń tıimdiligin kórsetti.

Joba negizgi bes qadamnan turady:

1. Ákimdik belgili bir máseleni damytý nemese ózgertý týraly taqyrypty turǵyndardyń nazaryna usynady;

2. Taqyryp ınternet resýrsqa ornalastyrylady. Turǵyndar talqylaıdy, pikir bildiredi;

3. Ákimdik kópshilikten qoldaý tapqan jobany jarııalaıdy;

4. Qoldaý tapqan jobany ákimdik qalaı júzege asyryp jatqanyn habarlap otyrady;

5. Jobanyń qalaı júzege asyrylǵanyn jáne qorytyndylary qalaı bolǵany týraly ınfografıka túrindegi esep jarııalanady.

«Qazirgi ýaqytta kraýdsorsıng tásili bıznes, áleýmettik nemese qoǵamdyq máselelerdi sheshý quraly retinde tanylyp keledi. Sandyq tehnologııanyń múmkindikterin qoldaný arqyly problemalardy ońtaılandyrýǵa arnalǵan joba azamattardyń talap-tilekterin qanaǵattandyrady degen oıdamyz. Mundaı tájirıbe Reseı, Fınlıandııa elderiniń birneshe kompanııalarynda qoldanylady. Aldaǵy ýaqytta jemisin beretini daýsyz», - deıdi jobanyń jumys toby.