Halyq onlaın tólemderdi belsendi túrde paıdalanýda– Ulttyq bank

NUR-SULTAN. QazAqparat – Ulttyq tólem júıesin qurý boıynsha belsendi jumys júrgizilip jatyr. Bul týraly Úkimet otyrysynda bıylǵy jeti aıdaǵy áleýmettik-ekonomıkalyq damýdy talqylaý kezinde Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.

«Qolma-qol aqshasyz tranzaktsııalar halyq tarapynan barynsha suranysqa ıe bolyp otyr. Osy jylǵy 6 aıda olardyń kólemi ótken jyldyń uqsas kezeńimen salystyrǵanda 29,8 trln teńgege deıin 2,3 ese ósti», - E. Dosaev.

Onyń aıtýynsha, halyq onlaın tólemderdi belsendi túrde paıdalanýyn jalǵastyrýda, bıylǵy jyldyń basynan bastap qolma-qol aqshasyz tranzaktsııalardyń 83 paıyzy onlaın bankıng arqyly jasaldy.

«Memleket basshysynyń tapsyrmasyna sáıkes Ulttyq tólem júıesin qurý boıynsha belsendi jumys júrgizilip jatyr. Visa jáne Mastercard halyqaralyq tólem júıelerimen ulttyq tólem júıesinde teńgedegi tranzaktsııalardy óńdeý úshin aldyn ala ýaǵdalastyqqa qol jetkizildi. Union Pay halyqaralyq tólem júıesimen ýaǵdalastyqqa qol jetkizý boıynsha jumys bastaldy. Shapshań tólemder júıesin qurý aıasynda servısterdi budan ári testileýge jáne ekinshi deńgeıdegi banktermen ıntegratsııalaýǵa arnalǵan platforma ázirlendi. Ulttyq tólem júıesi shapshań tólemder qunyn 2 eseden asa tómendetýge, 2025 jylǵa deıin qolma-qol aqshasyz esep aıyrysý úlesin 57%-dan 65%-ǵa deıin ulǵaıtýǵa múmkindik beredi», - dedi UB basshysy.