«Halyq lotereıaǵa sene me?» - BAQ-qa sholý
***
«Egemen Qazaqstan» basylymynyń jazýynsha, Almaty qalasynyń eń basty máseleleriniń biri bolyp otyrǵan kólik qatynastaryn retteıtin jolaıryq qurylysynyń jumysymen tanysqan Memleket basshysy, atalǵan nysandy salyp jatqan jobalaýshy jáne merdiger kompanııalardyń atqaryp jatqan isine oń baǵasyn berdi.
- Aımaqtardy aralaǵanda, onyń ishinde Almaty qalasynda bolǵan kezimde men qaıtadan salynyp jatqan kóliktik jáne áleýmettik nysandardyń qurylystarymen tanysyp otyramyn. Mundaı qurylystar halqymyzdyń turmysy men qalalarymyzdyń damýyna erekshe úles qosary anyq. Osyndaı jolaıryqtar men jaıaý júrginshi joldary - Almaty qalasyndaǵy kólik keptelegin azaıtýǵa baǵyttalǵan sharalar. Sońǵy jyldarda ǵana qalada 13 jolaıryq salyndy jáne mundaı qurylystyń sany Almaty qalasy boıynsha 20-ǵa jetip, keleshekte jalǵasyn taba beretin bolady, - dedi Elbasy Nursultan Nazarbaev jol qurylysynyń jumysymen tanysqannan keıin.
Qalanyń kólik ınfraqurylymyn jaqsartatyn atalǵan jolaıryq jobasy jýyrda ǵana paıdalanýǵa berilip, qazirgi tańda tek bul nysannyń syrtqy sıpaty men mańaıyn kógaldandyrý, sý qubyrlaryn júrgizip, jaıaý júrginshilerge arnalǵan jalǵyz aıaq joldarynyń jumysy atqarylýda. Bul jaıynda basylymnyń búgingi sanyndaǵy «Jańa jolaıryq pen jańa keshen - Elbasy nazarynda» degen taqyryppen berilgen.
Elimizdiń bas basylymynda «Ataqty Klıchkolar Áýlıeata óńirine kelip qaıtty» atty maqala kópshilik nazaryna usynylyp otyr. Ýkraın eliniń belgili kásipqoı boksshylary Vıtalıı jáne Vladımır Klıchkolar ózderiniń balalyq shaǵy ótken jerdi aralady. Olar aldymen Taraz qalasyna kelip, oblys ákimi Qanat Bozymbaevpen birge jaqynda ǵana qurylysy aıaqtalǵan «Taraz-Arena» sport kesheninde boldy. Odan keıin Turar Rysqulov aýdanynyń ortalyǵy - Qulan aýylyna sapar shekti. Munda Vıtalıı men Vladımır qazirgi Qulan, burynǵy Lýgovoı aýylyndaǵy bir kezderi ata-anasymen birge turǵan úıge baryp, ózderi alańsyz oınap ósken aýlany aralady. Qara shańyraqtaryn áli kúnge deıin buzbaı otyrǵan úıdiń búgingi qojaıynyna eskertkish syılyq tapsyrdy. Oqyǵan mektebine de soǵyp, onyń búginde balabaqshaǵa aınalǵanyn kórdi. Vıtalııdiń bala kezdegi ustazdary men bir-eki synyptastary da tabylyp, ótken jyldardan este qalǵan qyzyqty oqıǵalar da aıtyldy. Aǵaıyndy boksshylar ózderi júrgen kóshelerdi de aralap kórip, saǵynyshty jyldaryn eske aldy. Tarıhqa bir sát kóz júgirtsek, álem chempıondarynyń atasy Rodıon Klıchko men ájesi Tamara Efımovna soǵystan keıin Qazaqstanǵa jer aýdarylady. Mine, sol jyldary búginde kúrzi judyryǵymen álem boks jankúıerleriniń tańdaıyn qaqtyrǵan Klıchkolardyń ákesi Vladımır dúnıege keledi. Ol oqyp, erjetken soń ushqyshtar ýchılışesin ınjener-qurylysshy mamandyǵy boıynsha bitirip, Chehoslovakııada, Qyrǵyzstanda, Qazaqstanda jáne Baltyq jaǵalaýy elderinde áskerı áýejaılar salý boıynsha qyzmet etedi.
***
«Ótken jyly qazaqstandyqtar 5 mıllıard teńgege lotereıa satyp alypty! Sonyń arqasynda utysty uıymdastyrýshylar eki mıllıard teńgeden astam taza paıda tapqan eken. Mundaı málimetter keshe Májilis minberinen aıtyldy. Úkimet Parlamentke lotereıa qyzmetin retteýge baǵyttalǵan jańa zań jobasyn engizgen eken. Keshe Sport isteri jáne deneshynyqtyrý agenttigi qalaýlylar aldynda osy qujattyń tusaýyn kesti»,-dep jazady «Aıqyn» basylymy búgingi sanyndaǵy «Halyq lotereıaǵa sene me?» degen maqalada.
- Elimiz boıynsha lotereıalyq qyzmetti júzege asyrýdyń jıyntyqtyq aınalymy 5 mıllıard teńge boldy, - dep habarlady Agenttik tóraǵasy Erlan Qojaǵapanov. - Sonyń 400 mıllıonyn olar salyq túrinde tóledi. Munyń syrtynda 2 mıllıardtaı teńge utystardy tóleýge jumsalǵan. Sonda olar shamamen 2 mıllıardtan astam taza tabys tapqan bolyp shyǵady.
Bir qyzyǵy sol, Agenttik halyqtyń lotereıaǵa budan da kóp qarjy shyǵyndaǵanyn maqsat tutyp otyr eken. E.Qojaǵapanov osy zańdaǵy tetikter iske qosylǵan soń, osy sala aınalymy taǵy 30 paıyzǵa artatynyn boljady. Onyń aıtýynsha, lotereıa satyp alǵysy keletin halyqtyń senimine alaıaqtar selkeý túsirip otyr. - Iá, alaıaqtyq oqıǵalary bar, - dedi Agenttik basshysy. - Ókinishke qaraı, lotereıa salasyn zańnamalyq retteýdiń joqtyǵy kesirinen, tergeý júrgizý kezinde quqyq qorǵaý organdary alaıaqtyq faktisin dáleldeý múldem múmkin bolmaıtyn quqyqtyq qıynshylyqtarǵa mańdaı soǵady.
Osy basylymda «Tóle bıdiń toıy Tarazda ótti» degen maqala berilgen. «Danagóı abyz Tóle bıdiń toıy týǵan jeri - Áýlıeata óńirinde jalǵasty. Taraz qalasyndaǵy Tóle bı dańǵyly men Jeltoqsan kóshesi qıylysynan Tóle bıge eskertkish ashylyp, dana bı óziniń tuǵyryna qondy. Eskertkishtiń ashylý saltanatyna Mádenıet jáne aqparat mınıstri Muhtar Qul-Muhammed bastaǵan elge esimderi tanymal zııaly qaýym qatysty. Oblys ákimi Qanat Bozymbaev kópshilikti quttyqtap, sóz sóıledi»,-dep jazady maqala avtory.
***
«Ana tili» gazetiniń sońǵy sanynda medıtsına ǵylymynyń doktory, professor, akademık Tóregeldi Sharmanovtyń «Densaýlyq jáne din» degen maqalasy basylǵan. «Bizdiń ıslam dinimizdiń qaǵıdalarynyń densaýlyqqa eshbir zııan jeri joq ekenin, qaıta zor paıdasy baryn aıtý kerek. Eń birinshi ol densaýlyqqa zııan keltiretin ádetterge qarsy. Mysaly, araq-sharap ishimdikterinen aýlaq bolýy talap etiledi. Aýrýlardyń aldyn alý sharalaryna da dinı turǵydan zor mán berilgen. Máselen, ne bolsa sony iship-jeı berý de kúná sanalady»,-dep jazady ǵalym.
***
«Astana aqshamy» basylymynyń búgingi sanynda «Qala mańynan ázirshe jer berilmeıdi» degen taqyryppen Astana qalasy Jer qatynastary basqarmasynyń basshysy Tóleýǵazy Nurkenovpen aradaǵy suhbat jarııalandy. «Ras, jekemenshik úı salý úshin bir ret on sotyq jerdi tegin alýǵa bolatyny jónindegi bap Jer kodeksinde áli bar. Qazirgi kezde ıgerilgen jerlerde ınfraqurylymnyń joqtyǵynan qala mańynda jer berý toqtatyldy. Qazirgi kezde mundaı daıyn jer bolmaı tur»,-deıdi basqarma basshysy.