«Halyq qatysatyn bıýdjet» jobalaryn qarjylandyrý 10 esege ulǵaıtylady

NUR-SULTAN. QazAqparat – «Halyq qatysatyn bıýdjet» jobalaryn qarjylandyrý 10 esege ulǵaıtylady. Bul týraly QR Ulttyq ekonomıka mınıstrligi Óńirlerdi taldaý jáne jergilikti ózin-ózi basqarýdy damytý departamentiniń dırektory Anar Baıtúkenova aıtty, dep habarlaıdy QazAqparat tilshisi.

«Ótken jyly pılottyq rejımde Nur-Sultan, Almaty, Shymkent qalalarynda jáne barlyq oblys ortalyqtarynda «Halyq qatysatyn bıýdjet» quraly sátti engizildi. Ol azamattardyń bıýdjet protsesine keńinen qatysýyn kózdeıdi. Aýlalar men sport alańdaryn abattandyrý boıynsha 2,3 mlrd teńge somasyna 81 joba iske asyryldy. Pılottyq jobanyń oń nátıjelerin eskere otyryp, «Halyq qatysatyn bıýdjet» aıasyndaǵy jobalardy qarjylandyrý kólemin 10 ese ulǵaıtý kózdelip otyr», - dedi Anar Baıtúkenova.

Sonymen qatar ol jergilikti bıýdjetterdi bekitý protsesine baqylaýdy kúsheıtý maqsatynda ınfraqurylymdyq jáne áleýmettik bastamalarǵa arnalǵan shyǵystar boıynsha onlaın-suraýlardy qoldanýdy qosa alǵanda, qoǵamdyq saraptamalardy engizý kózdeletindigin aıtty.

«Bul is-sharalar halyqtyń naqty qajettilikterin eskerýge jáne azamattardyń jergilikti atqarýshy bılik organdaryna senim deńgeıin arttyrýǵa múmkindik beredi», - dedi departament dırektory.