«Halyq qatysatyn bıýdjet» aýqymy aýdandyq mańyzy bar qalalarda keńeıtiledi

NUR-SULTAN. QazAqparat – «Halyq qatysatyn bıýdjet» aýqymy aýdandyq mańyzy bar qalalarda keńeıtiledi. Bul týraly Úkimet otyrysynda QR Qarjy vıtse-mınıstri Erjan Birjanov aıtty, dep habarlaıdy QazAqparat tilshisi.

«Halyqtyń memlekettik qarjyny basqarý men baqylaýǵa qatysýy boıynsha bıýdjetteýdiń jańa praktıkalaryn qoldaný maqsatynda normatıvtik quqyqtyq aktilerge tıisti túzetýler engiziletin bolady. Bul «halyq qatysatyn bıýdjettiń» aýqymyn aýdandyq mańyzy bar qalalar men aýyldarǵa keńeıtýge múmkindik beredi», - dedi ol.

Vıtse-mınıstrdiń atap ótýinshe, óz kezeginde, halyqty bıýdjettik sheshimder qabyldaý protsesine tartý protsestiń ashyqtyǵyn qamtamasyz etedi. Azamattardyń jergilikti bılikke senimin nyǵaıtady.

«Sonymen qatar halyqtyń habardarlyǵyn jáne qarjylyq saýattylyǵyn arttyrady. Infraqurylym obektileriniń sapasy men uqypty paıdalanylýy úshin ortaq jaýapkershilikti qamtamasyz etedi», - dedi Erjan Birjanov.