Halyq esh qysymsyz óz erkimen daýys berip jatyr – Elshi referendým týraly

NUR-SULTAN. QazAqparat – Palestına memleketiniń Qazaqstandaǵy Tótenshe jáne Ókiletti Elshisi Montasyr Ábýzeıd elordada ótip jatqan referendýmǵa óz baǵasyn berdi, dep habarlaıdy QazAqparat tilshisi.

«Búgin biz kóptegen ýchaskelerge baryp, halyqtyń qalaı daýys berip jatqanyn kórdik. Barlyǵy óz erkimen, eshqandaı qysymsyz, jaqsy kóńil-kúımen kelip jatyr. Biz eshqandaı buzýshylyty baıqamadyq. Óz atymnan Qazaqstan Respýblıkasynyń Prezıdenti Qasym-Jomart Toqaev basshylyq etip otyrǵan qazaq halqyna tabys pen baq-bereke tileımin», - dedi dıplomat elordada ótken baspasóz máslıhatynda.

Buǵan deıin Halyqaralyq Túrki akademııasynyń baıqaýshylary Qazaqstandaǵy referendýmdy joǵary qyzyǵýshylyqpen baqylap otyrǵandaryn aıtqan edi. Olar tańǵy 7-den beri referendým ýchaskelerin aralap júr.

Sonymen birge Qyrǵyzstannan Qazaqstanǵa 15 halyqaralyq baıqaýshy keldi. Olar Nur-Sultan men Almaty qalalarynda, Jambyl jáne Almaty oblystarynda jumys istep jatyr.

Jalpy Ortalyq referendým komıssııasy halyqaralyq uıymdar men shet memleketterden 272 ókildi baıqaýshy retinde akkredıttegen.

Aıta keteıik, búgin elimizde respýblıkalyq referendým ótip jatyr. Referendým barysynda el turǵyndary Konstıtýtsııamyzdyń 33 babyna 56 ózgeris engizý máselesine qatysty óz daýystaryn beredi.