Halyq buryn ákimdi izdese, qazir depýtatty izdeıdi - AMANAT tóraǵasy

ASTANA. QazAqparat – QR Parlamenti Májilisi men AMANAT partııasynyń tóraǵasy Erlan Qoshanov partııa atynan saılanǵan máslıhat depýtattarynyń respýblıkalyq forýmynda saılaýshylarǵa bergen ýádelerdiń quny týraly oı qozǵady, dep habarlaıdy QazAqparat tilshisi.

«Kúni keshe ǵana Túrkistanda ótken ulttyq quryltaıda Memleket basshysy «Ádiletti Qazaqstan men Adal azamat» kontseptsııasyn usyndy. Ádilet pen adaldyq – ajyramas uǵymdar. Al, osy uǵymdardyń saltanat qurýy úshin qoǵamdyq sana men áleýmettik qundylyqtar ózgerýi kerek. Sonda ǵana kózdegen maqsatymyzǵa jetemiz. Bul bizge de qatysty. Osy jolda AMANAT partııasy barlyq ıgi isterdiń alǵy shebinde júrýi tıis», - dedi Erlan Qoshanov.

Sondaı-aq, Májilis tóraǵasy halyqtyń bılikke oryndalmaıtyn talap qoıyp otyrmaǵanyn atap ótti.

«Qazir onsyz da qoǵamnyń suranysy kúsheıdi. Alaıda, azamattar bizden oryndalmaıtyn nárseni surap otyrǵan joq. Olar bergen ýádemizdiń ýaqytynda ári sapaly oryndalýyn, reformalardyń naqty nátıjesin taǵatsyzdana kútip otyr. Olaı bolsa, depýtattardyń bel sheship jumysqa kirisetin shaǵy keldi. Bul, ásirese, máslıhat depýtattaryna qatysty. Sizder – partııanyń jergilikti jerdegi ókilisizder. Búkil óńirlik saıasatqa yqpal etesizder. Sizderdiń moıyndaryńyzdaǵy júk jeńil emes. Buryn halyq ákimdi izdeıtin, qazir depýtattan suraıdy. Ne jaǵdaı bolsa da, «AMANAT qaıda?» deıdi. Ony ózderińiz de sezinip jatqan shyǵarsyzdar. Biz osy synaqqa daıyn bolýymyz kerek», - dedi partııa tóraǵasy.