Halyk Arena COVID-19 gospıtali bolýǵa qalaı daıyndalyp jatyr

ALMATY. QazAqparat - Almatyda Halyk Arena sport kesheni bazasynda koronavırýstyq ınfektsııamen aýyrǵandarǵa ýaqytsha gospıtal ashylady. Qazir sport saraıynda daıyndyq jumystary júrip jatyr, dep habarlaıdy QazAqparat tilshisi.

Munyń aldynda daıyndyq jumystary týraly vıdeo jarııalanǵan bolatyn.

«Halyk Arena bazasynda ınfektsııalyq statsıonar oryndaryn ashý májbúrlikten týǵan sheshim. Aýrýhanalarda oryn jetpegendikten, osyndaı qadamǵa baryp otyrmyz. Osyndaı qıyn ýaqytta qala qyzmetterine kómek kórsetýimiz kerek. Bul shara kóptegen azamattardyń ómirin saqtap qalýǵa kómektesedi dep senemiz», - dedi sport saraıynyń «M-Line Property Management» basqarýshy kompanııasynan.

Qazir sport saraıynda jumys istep turǵan sport sektsııalary, Halyk Arena keshenin jalǵa alýshylar ýaqytsha Almaty Arena keshenine kóshedi.

«Sportshylarǵa daıyndyq kezeńin úzýge bolmaıdy. Sondyqtan, sport keshenin jalǵa alýshylardyń Almaty Arena keshenine kóshýin qarastyrýdy suradyq», - dedi olar.

Basqarýshy kompanııa ókilderi sport keshenin ózgertýge barynsha muqııat bolǵanyn aıtty.

«Sport nysanyn gospıtalge aınaldyrý tek oryn bosatý emes, qajetti mıkroklımat jasaý, sanıtarlyq aımaqtar túzý, bólmelerdiń jeldetilýin, tazalyǵyn qamtamasyz etý bolyp otyr. Basqarýshy kompanııa sport nysanynyń qaıta óz profıline eshbir nuqsansyz aýysýyna kepil bolady», - dedi kompanııadan.

Aıta ketý kerek, buǵan deıin qalalyq Qoǵamdyq densaýlyq basqarmasynyń basshysy Kamaljan Nadyrov Almatyda koronavırýs boıynsha epıdemıologııalyq ahýal kúrt nasharlasa, HalykArena jáne Almaty Arena sport keshenderi bazasynda ınfektsııalyq statsıonar ashylatynyn habarlaǵan bolatyn.