Halqymyzdyń qundylyqtar tizbesin anyqtaý qajet – Dınara Zákıeva
«Zamanaýı álem tańqalarlyq jáne alýan túrli. Sonymen qatar búgingi álem balalardyń dúnıetanymyn qalyptastyrýda belgili bir qaýip-qaterlerge ıe. Qazirgi tańda zańdylyq pen tártip, eńbeksúıgishtik pen birlik qaǵıdattaryn nyǵaıtý qajettiligi kóp aıtylady. Rasymen de qundylyqtardy dáripteý, ásirese óskeleń urpaq úshin óte mańyzdy ári paıdaly. Bul turǵyda áriptesterimizben sheteldik tájirıbeni de zerttep kórdik. Taldaý barysynda ulttyq biregeılikti qalyptastyrýdyń negizgi qaǵıdaty – irgeli qundylyqtardy ulttyq deńgeıde bekitý ekenin baıqadyq. Osylaısha, biraz elde naqty belgilengen qundylyqtar tizimi bekitilgen», - dedi ýákil.
Onyń atap ótýinshe, máselen, brıtan halqynyń 5 qundylyǵy bar. Ol – zań ústemdigi, demokratııa, jeke bas bostandyǵy, ózara qurmet, tózimdilik. Bul qundylyqtar mektep baǵdarlamasyna engizilgen jáne balalar kitaptarynda beınelengen. Sondaı-aq Sıngapýrda 5 ortaq qundylyq, BAÁ-de adamgershilik tárbıesiniń 4 tiregi bekitilgen.
«Qurmetti Qasym-Jomart Kemeluly! Siz de túrli minberlerde qundylyqtar men olardyń mańyzy jóninde udaıy aıtyp kelesiz. Qoǵam muny jaqsy qabyldaıdy. Soǵan negizdeı otyryp, halqymyzdyń belgili bir qundylyqtar tizbesin anyqtaý qajet dep sanaımyz jáne bul qundylyqtardy balalardyń boıyna mektep kezinen bastap sińirý usynylady. Árıne, bul baǵytta tıisti aqparattyq jumys júrgizý qajet dep sanaımyz. Álbette, tizim qundylyqtardyń bárin qamtı almaıdy. Alaıda, ol bala ómiriniń aınymas temirqazyǵy, týra joldan taımaýǵa baǵdar bolatyn shamshyraǵy bola alady. «Bala tárbıesi basty baılyǵyń, keshikseń kóretiniń qaıǵy-muń», dep hákim Abaı aıtqandaı, urpaq tárbıesi - el bolashaǵy», - dedi Dınara Zákıeva.