Halyqaralyq Qyzyl Krest komıteti Qazaqstanǵa alǵysyn bildirdi

<p>ASTANA. KAZINFORM — Qazaqstannyń Syrtqy ister mınıstriniń birinshi orynbasary Aqan Rahmetýllın Halyqaralyq Qyzyl Krest Komıtetiniń (HQKK) Ortalyq Azııadaǵy óńirlik delegatsııasynyń basshysy Bılıana Mıloshevıchpen kezdesti, dep habarlaıdy vedomstvonyń baspasóz qyzmeti.</p>

— B.Mıloshevıch Qazaqstanǵa HQKK-nyń gýmanıtarlyq mıssııasynoryndaýda turaqty qoldaý kórsetkeni úshin alǵys bildirdi. Ol Qazaqstan óz azamattaryn qarýly qaqtyǵystar aımaqtarynan, atap aıtqanda Sırııa men Iraktan qaıtarý jónindegi kúsh-jigerin joǵary baǵalady, — delingen mınıstrlik habarlamasynda.

Qazaq dıplomaty HQKK-nyń gýmanıtarlyq mıssııasynyń mańyzdylyǵyna nazar aýdaryp, bıyl álem merekelep jatqan Jeneva konventsııalarynyń 75 jyldyǵy men onyń rólin erekshe atap ótti. Elimizdiń Halyqaralyq Qyzyl Krest jáne Qyzyl Jarty aı qozǵalysymen birlesken jumysynyń jalǵastyrýyna beıildik rastaldy.

Taraptar Qazaqstan, Brazılııa, Qytaı, Frantsııa, Iordanııa jáne Ońtústik Afrıka Respýblıkasy 2024 jylǵy qyrkúıekte Nıý-Iorkte jarııalanǵan Halyqaralyq gýmanıtarlyq quqyqqa saıası qoldaýdy arttyrý jónindegi jahandyq bastama aıasynda odan ári is-qımyldardy talqylady.

Buǵan qosa suhbattastar Ortalyq Azııa, Aýǵanstan men Taıaý Shyǵystaǵy halyqaralyq qatynastardyń ózekti máseleleri boıynsha pikir almasty.

HQKK — soǵys, zorlyq-zombylyq jáne gýmanıtarlyq apattar qurbandaryna kómek kórsetýdi maqsat etken táýelsiz uıym. Ol 1992 jyldan beri Ortalyq Azııada qyzmet atqarady, Tashkentte óńirlik ókildigi jáne Astanada ókildigi bar.

Buǵan deıin Japon hanshaıymy Aıko Qyzyl Krest uıymyndaǵy qyzmetine kiriskenin habarlaǵan bolatynbyz.