Halyqaralyq qarjy uıymdary áıelder kásipkerligin qoldaýǵa múddeli – Nurlan Baıbazarov

<p>ASTANA. KAZINFORM &mdash; Jańadan taǵaıyndalǵan Ulttyq ekonomıka mınıstri Nurlan Baıbazarov áıelder kásipkerligin qarjylyq qoldaý baǵdarlamalaryn ázirleýge ýáde berdi.</p>

Onyń aıtýynsha, bul baǵytta halyqaralyq qarjy uıymdary qoldaý jasaýǵa múddeli.

Ómirlik qıyn jaǵdaıǵa tap bolǵan áıelderdi jumyspen qamtyp otyrǵan áleýmettik kásipkerler salyq jeńildikterin surap otyr. Olar mańyzdy áleýmettik máselelerdi sheship jatyr. Bul rette Kazinform tilshisi Ulttyq ekonomıka mınıstrliginiń áleýmettik kásipkerlerge salyq jeńildikterin engizý múmkindigi jaıynda surady.

«Áıelder kásipkerligin damytýǵa qatysty jýyrda shaǵyn jáne orta bıznesti qoldaýdyń jańartylǵan baǵdarlamasy bekitildi. Operator – «Damý» qory. Onda alǵash ret «Áıelder kásipkerligi» baǵyty bólek engizildi. Jańa baǵdarlama aıasynda áıelder kásipkerligin damytý úshin jeńildikti qarajat, sondaı-aq sýbsıdııalar bólinedi. «Damý» qory ótinishterdi qabyldaıtynyn resmı túrde jarııalady. Sondyqtan «Damý» qoryna habarlasyp, áıelder kásipkerligin qoldaýdyń joldary týraly naqty túsinikteme alýǵa bolady», - dedi N. Baıbazarov.

Sonymen qatar mınıstrge «Áleýmettik kásipkerlik týraly» Zańda belgilengen barlyq 9 jeńildiktiń qashan iske qosylatyny týraly suraq qoıyldy.

«Men bul suraqty naqtylaımyn. Qazir qarjylyq qoldaý sharalary qarastyrylǵanyn aıta alamyn jáne biz bul salany damytamyz. Onda «Damý» arqyly ǵana emes, halyqaralyq qarjy uıymdary jaǵynan áıelder kásipkerligin qoldaýǵa qatysty usynys bar. Jańa qarjylyq qoldaý baǵdarlamalary bolady», - dep qosty Nurlan Baıbazarov.