Aqorda Halyqaralyq balalardy qorǵaý kúninde oqýshylarǵa esigin ashty
Elimizdiń barlyq óńirlerinen kelgen halyqaralyq jáne respýblıkalyq olımpıadalardyń jeńimpazdary, shyǵarmashylyqta jáne sportta joǵary jetistikterge jetken balalar, belsendiler men eriktilerdiń tynymsyz izdenisteri osy sapar arqyly eskerildi. Bıyl Aqordaǵa sý tasqynynan zardap shekken óńirlerdiń balalary da keldi.
Bul saıahat balalarǵa Elordanyń tarıhı róli jáne biregeı sáýlet ansambli – Qazaqstan Respýblıkasy Prezıdentiniń rezıdentsııasymen tanysýǵa múmkindik berdi. Ekskýrsııa barysynda balalar El Prezıdentiniń jumys tártibimen, «Aqorda» rezıdentsııasy jáne onyń aımaǵyndaǵy baqshaǵa baılanysty qyzyqty faktilerden habardar boldy.
Sonymen qatar, eki kúndik is-shara aıasynda balalar Prezıdenttik ortalyq, Ulttyq mýzeı, «Nur-Álem» pavılony sııaqty elordanyń kórikti jerlerine baryp, elimizdiń baı mádenı jáne tarıhı murasymen tanysady.
Kezdesý barysynda balalar ózderiniń jetistikteri men bolashaqqa josparlary týraly baıandady. Sondaı-aq oqýshylar Memleket basshysynyń atynan estelik syılyqtar aldy.
Bul oqıǵa daryndy balalardy qoldaýdaǵy jáne olardyń odan ári damýyna jaǵdaı jasaýdaǵy mańyzdy qadam. «Aqorda» óz esigin jańa urpaqty joǵary maqsattarǵa jetýge jáne Qazaqstannyń mádenı jáne qoǵamdyq ómirine belsendi qatysýlaryn jalǵastyrýǵa shabyttandyrý úshin ashty.