«Halyq qatysatyn bıýdjet» baǵdarlamasy: Aýlasyn kórkeıtken Almaty turǵyny jurtty tańǵaldyrdy
Osy jyldyń mamyr aıynda almatylyq Natalıa Lazareva «Úzdik aýla» nomınatsııasynyń jeńimpazdarynyń biri atandy. Onyń ıdeıasy boıynsha abattandyrylǵan qoǵamdyq keńistik konkýrstyq komıssııaǵa unady. Biraq joba áleýmettik jelilerge jarııalanǵannan soń keńinen tanyldy.
Natalıa aýlany abattandyrý ıdeıasyn kórshilerimen birge 2020 jyly qolǵa alǵanyn aıtty: turǵyndar jasyl jelek ósirip, mıksborder arasyna bordıýrler jasady. Osydan keıin aýla turǵyndary «Halyqa qatysatyn bıýdjet» baǵdarlamasyn paıdalandy.
«Men jospar qurdym, bizde sarqyramasy bar alpilik tóbeshik bolǵanyn qalaımyn. Ózim qalaıtyn aýlanyń eskızin jasadym», - dedi Natalıa Lazareva.
Ótinim maquldanǵannan keıin, Almaly aýdany ákimdiginiń tapsyrysy boıynsha 2023 jyly aýlada merdiger jaryqtandyrý, rezeńke jabyn ornatty, alpilik tóbeshik jaraqtandyryldy, tósenishter paıda boldy, aýla kógaldandyryldy, kishi sáýlet pishinderi qoıyldy, avtosýarý iske qosyldy.
«Bıyl biz «Eń úzdik aýla, jasyl jelek, kommýnaldyq qyzmetker» baıqaýyna qatystyq. Óıtkeni bizde eń aýlamyz eń úzdik dep eseptedik. Bul meniń hobbıim. Shabytym oıandy, isti qolǵa aldym», - dedi Natalıa Lazareva baıqaýda qalaı jeńiske jetkeni týraly.
Esterińizge sala keteıik, «Úzdik aýla jasyl jelek, kommýnaldyq qyzmetkeri» baıqaýy «Almaty – bizdiń ortaq úıimiz» naýqany jáne «Taza Qazaqstan» respýblıkalyq aktsııasy aıasynda ótti.
500 myń teńgelik sertıfıkatqa qala turǵyndary aýlaǵa kútim jasaý jabdyqtaryn satyp aldy.
Jaqynda almatylyq Vladıslav Prıtýlıak Instagram paraqshasynda beınerolık jarııalady. Onyń aıtýynsha, ol Almatydaǵy eń ádemi aýlany tapqan. Ol «Halyq qatysatyn bıýdjet» baǵdarlamasy boıynsha abattandyrylǵan Natalıa Lazarevanyń aýlasy bolǵany tańqalarlyq emes.
Jazba jelide júzdegen tańdanys bildirgen pikirler bar. Qala turǵyndary Natalıanyń úlgisi boıynsha óz aýlalaryn kórkeıtip, abattandyra alady: 2024 jyly Almatyda «Halyq qatysatyn bıýdjetke» 18,8 mlrd teńge bólindi. Bul ótken jylmen salystyrǵanda 5,8 mlrd teńgege artyq. Qala turǵyndary aýlalardy, qoǵamdyq keńistikterdi abattandyrý, sport jáne oıyn alańdaryn qurý boıynsha 364 jobany usynyp, júzege asyra alady.