Halel Dosmuhamedov atyndaǵy Atyraý ýnıversıtetine qatysty tergeý bastaldy

Halel Dosmuhamedov atyndaǵy Atyraý ýnıversıteti aımaq naryǵynda 70%-dan astam úlesimen ústemdikke ıe. Bul Básekelestikti qorǵaý jáne damytý agenttiginiń Atyraý oblysy boıynsha departamenti joǵary bilim berý (bakalavrıat) qyzmetteri naryǵynda básekelestiktiń jaı-kúıin taldap, baǵalaý júrgizý kezinde anyqtaldy, dep habarlaıdy QazAqparat.

«Atalǵan JOO-da «Standarttaý, metrologııa jáne sertıfıkattaý», «Esepteý tehnıkasy jáne baǵdarlamalyq qamtamasyz etý», «Aqparattyq júıeler» jáne basqa da birqatar mamandyqtar boıynsha oqý quny Atyraý ınjenerlik-gýmanıtarlyq ınstıtýty, Safı Ótebaev atyndaǵy Atyraý munaı jáne gaz ýnıversıtetindegi uqsas mamandyqtarǵa qaraǵanda 35-60%-ǵa joǵary ekeni belgili boldy», - dep jazdy vedomstvodan.

Osyny qaperge alǵan óńirlik monopolııaǵa qarsy departamenti Halel Dosmuhamedov atyndaǵy Atyraý ýnıversıtetine qatysty 2022 jyldyń 10 maýsymynda monopolııalyq joǵary baǵalardy belgilep, ustap turǵany úshin tergep-tekserý jumystaryn bastady.