Halal ónimdi Qazaqstan musylmandary dinı basqarmasy anyqtaıdy - mınıstrlik

ASTANA. QazAqparat - Qazaqstanda ónimder men taýarlardyń halal standartyna saı ekenin Qazaqstan Musylmandary dinı basqarmasy bekitetin bolady. Bul týraly Úkimet otyrysynan keıin ótken baspasóz máslıhatynda QR Investıtsııalar jáne damý mınıstrligi Tehnıkalyq retteý jáne metrologııa komıtetiniń tóraǵasy Ǵalymjan Doǵalov aıtty, dep habarlaıdy «QazAqparat» HAA tilshisi.

Komıtet tóraǵasyna BAQ ókilderi tarapynan: «Halal» dep belgilengen taýarlar kóbeıip ketti. Ol standarttardy kim berip jatyr?», - degen saýal qoıyldy.

«Búgingi kúni bul jumyspen Qazaqstan Musylmandarynyń dinı basqarmasy aınalysyp jatyr. Olar birqatar ónimderdiń túrin bekitti. Sonymen birge, osy standarttardy belgileıtin malaızııalyq departamentpen jumys júrgizilýde. Demek, malaızııalyq tájirıbe negizge alynyp otyr. Sondaı-aq óz tarapymyzdan sáıkesinshe semınarlar ótkizip, Aýyl sharýashylyǵy mınıstrligimen birlesken jobany qolǵa aldyq», - deıdi komıtet tóraǵasy.

Onyń aıtýynsha, Qazaqstanda ulttyq akkredıtteý ortalyǵy bar. Sol ortalyqta ónimderdi akkredıtatsııadan ótkizýge de bolady.

«Memleket taraby QR Din isteri jáne azamattyq qoǵam mınıstrligimen birge halal ónimderge memlekettik-ulttyq standarttardy engizbeý týraly sheshim qabyldady. Aıtyp ótkenimdeı, ónimniń halal ekenin Qazaqstan Musylmandary dinı basqarmasy bekitetin bolady. Qazirgi tańda Qazaqstan Musylmandary dinı basqarmasynyń janynda ónimdi ajyratatyn uıym jumys isteıdi», - deıdi Ǵalymjan Doǵalov.