Habar-osharsyz qalǵan otandasymyz Hataı provıntsııasynan tabyldy - SІM

ASTANA. QazAqparat – Túrkııadaǵy jer silkinisinen keıin habar-osharsyz qalǵan bir otandasymyz Hataı provıntsııasynan tabyldy. Bul týraly Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Túrkııadaǵy jer silkinisinen keıin mınıstrliktiń táýlik boıy jumys isteıtin jedel jelisine 1 myńnan astam qońyraý tústi. Negizinen Túrkııa aýmaǵyndaǵy týystaryn tabý týraly ótinishter aıtyldy. Sonymen qatar, Túrkııadaǵy dıplomattarymyzǵa qońyraýlar men ótinishter túsip jatyr. Olar osy birneshe kún ishinde 150-den astam otandasymyzdyń ornalasqan jerin anyqtap, Qazaqstandaǵy týystarymen baılanys ornatýǵa kómektesti. Óńirdegi aýyr jaǵdaıdy, baılanystyń bolmaýy nemese baılanystaǵy qıyndyqtardy eskere otyryp jáne azamattarymyzǵa qajetti kómek kórsetý úshin dıplomattar apat aımaqtaryna, atap aıtqanda eń kóp zardap shekken Gazıantep, Antakıa jáne Kahramanmarash qalalaryna bardy. Kóptegen otandasymyzǵa qaýipsiz jerge kóshýge kómek qajet boldy, olar kólikpen, tamaqpen jáne baspanamen qamtamasyz etildi», - dedi ol.

Aıbek Smadııarovtyń atap ótýinshe, keıbir azamattarymyz elge oralýǵa nıet bildirgen. Sonymen qatar, kóptegen qazaqstandyq turǵyn úıleriniń buzylýyna baılanysty qujattaryn joǵalqan. Konsýldar olarǵa qajetti jol júrý qujattaryn sol jerde rásimdep bergen.

«Keıingi 4 kúnde Gazıantep, Mersın, Kahramanmarash, Dııarbakyr, Shanlyýrfa, Adana, Konıa jáne Elıazyktan 124 Qazaqstan azamaty shyǵaryldy. Onyń ishinde 58 Qazaqstan azamaty Astanaǵa repatrıatsııalyq reıstermen jetkizildi. Sonymen qatar, Qazaqstannyń taǵy bir azamaty habar-osharsyz ketti dep eseptegenbiz. Biz ony Hataı provıntsııasynan taptyq, ol eki kún boıy baılanysqa shyǵa almaǵan. Qazir aman-saý, qaýipsiz jerde. Turatyn úıi zardap shekken joq», - dedi Aıbek Smadııarov.

Eske salsaq, QR SІM baspasóz qyzmeti taratqan málimetke saı, 7 aqpanda mınıstrliktiń jedel jelisine 4 dos jer silkinisinen keıin baılanysqa shyqpaı qalǵany týraly qońyraý túsken. Solardyń biri – Sabına Mamadıarova aman tabylǵan edi. Ol qazir Adana qalasynyń memlekettik aýrýhanasynda. Keshe onyń zaqymdalǵan qolyna ota jasalǵan.

Buǵan deıin habarlaǵanymyzdaı, Mırbolat (Mırýs) Qurmashev pen Ádil Qadyrbekovtiń deneleri tabyldy.

Marqumdardyń máıitteri 11 aqpanda elge jetkiziledi.