«Habar» arnasynda «Jańa kún – jańa Qazaqstan» telemarafony bastaldy

NUR-SULTAN. QazAqparat –Marafonnyń alǵashqy kúni televızııa maıtalmany Zeıin Álipbek, telejúrgizýshi Dınara Kýnafına, jýrnalıst Batyrjan Ibragımov balalar úıine baryp, «Habar» agenttigi arnaıy daıyndaǵan syılyqtardy tartý etti, dep habarlaıdy QazAqparat.

Arnaıy jobany uıymdastyrýshylardyń aıtýynsha, telemarafon aıasynda osyndaı ıgi is-sharalardy kún saıyn ótkizý josparlanýda. Marafonda stýdııaǵa keletin qonaqtarmen suhbattar jasalady, ulttyq sport túrlerinen kóptegen jarystar uıymdastyrylyp, júlde taratylady, muqtaj jandarǵa qaıyrymdylyq kómek kórsetiledi.

«Habar» agenttigi elimizge amanat qylǵan Naýryz merekesin 10 kúndik telemarafon retinde atap ótýdi bastap ketti. 10 kún ishinde biz tańǵy 7-den túngi 12-ge deıin Nur-Sultan, Almaty stýdııalarynan efırge shyǵyp otyramyz. Telemarafon aıasynda biz tarıhqa taǵzym etip, babalarymyzdy ulyqtaımyz, muqtaj jandarǵa jaqsylyqtar jasap, basqa elderde Naýryzdyń qalaı toılanatynyn kórsetemiz», - dedi «Habar» arnasynyń shef-redaktory Aıdos Turysbek.

Esterińizge sala keteıik, naýryzdyń 14-i kúni otandyq televızııa tarıhyndaǵy tuńǵysh 10 kúndik telemarafon «Habar» arnasynan kórermenge jol tartty. Ulystyń uly kúni Naýryz meıramyna arnalǵan «Jańa kún – jańa Qazaqstan» telemarafony naýryzdyń 23 deıingi aralyqta tikeleı efırde kórsetiledi.

Naýryzdyń 14-nen 23-ne deıin «Habar» arnasynan «Jańa kún - Jańa Qazaqstan» telemarafonyn tamashalaı alasyzdar.