«Habar» arnasynda «Maska» shoýynyń ekinshi maýsymy bastalady

NUR-SULTAN. QazAqparat - Erteń, 26 aqpan kúni «Habar» arnasynan ǵajaıyp pen syrǵa toly eń tanymal mýzykalyq «Maska» shoýynyń 2-maýsymy kórermenge jol tartady. Teleshoý ár senbi saıyn saǵat 19:15-te kórsetiledi, dep habarlaıdy QazAqparat.

Otandyq televızııadaǵy eń qupııa shoýdyń jańa maýsymynda erekshe obrazdaǵy 14 maska baq synap, óner kórsetedi. Maskanyń astynda ánshi, bıshi, ázilkesh, bloger, telejúrgizýshi, sportshylar jasyrynýy múmkin. Qupııanyń tolyqqandy saqtalýy úshin barlyq jaǵdaı jasalǵan. Juldyzdar barlyq ánderdi jandy daýysta oryndaıdy. Joba barysynda qatysýshylardyń ómirinen alynǵan shynaıy oqıǵalar baıandalady. Ol faktiler qazylar alqasynyń maska astynda kimniń jasyrylǵanyn anyqtaýǵa kómektesetin bolady.

«Maska» shoýynyń ekinshi maýsymyna qatysýshylar ǵana emes, qazylar alqasy da belsendi daıyndaldy. Ádil qazylar alqasynyń quramynda Marat Oralǵazın, Qaırat Ádilgereı, Janar Aıjanova, Erke Esmahan sııaqty tanymal juldyzdar bar. Ár shyǵarylymǵa arnaıy shaqyrylǵan qonaqtar qatysyp, oryndaýshylardyń qoıylymdaryn baǵalaýǵa atsalysady.

- Birinshi maýsym biz úshin jańashyldyqtarǵa toly boldy. Kórermenderdiń shoýǵa degen qyzyǵýshylyǵy óte joǵary bolǵandyqtan, synı pikirlerdiń bolǵany ras. Bul joly biz kórermenderdiń aıtqanyn eskerip, jańa maýsymǵa muqııat daıyndaldyq, - dedi tanymal ánshi Janar Aıjanova.

Shoýdyń ekinshi maýsymy emotsııaǵa toly bolmaq. Joba prodıýseri Gúlnur Mamasarıpova shoý erekshe tosynsyılarymen kórermenderdi tań qaldyratynyna senimin bildirdi.

- Ekinshi maýsym óte qyzyq bolady. Maskalardy jasaýǵa 4 arnaıy top jumyldyryldy. Biz barlyq qatelikterdi eskerip, apgreıd jasadyq. Jańa maýsymda «Habar» arnasynyń kórermenderin jańa maskalar, jańa juldyzdar kútýde. Qatysýshylar quramy ár alýan, olar erekshe óner kórsetýge baryn salady».

Esterińizge sala keteıik, The King of Mask Singer koreı jobasynyń qazaqstandyq analogy retindegi «Maska» mýzykalyq teleshoýy alǵash ret 2021 jyldyń naýryz aıynda ekranǵa shyǵyp, kórermenderdiń qyzyǵýshylyǵyna ıe boldy. Mýzykalyq jobanyń birinshi maýsymynyń jeńimpazy bolyp ánshi ári teatr ártisi Erden Jaqsybekov atandy. Jeltoqsan aıynda «Habar» telearnasy shoýdyń jańajyldyq arnaıy shyǵarylymyn usyndy. Oǵan kıno, sport jáne shoý-bıznes juldyzdary qatysty.

«Habar» telearnasyndaǵy «Maska» shoýynyń ekinshi maýsymy 26 aqpanda saǵat 19:15-te kórsetiledi.