«Habar» agenttigi jańa maýsymdaǵy jobalaryn tanystyrdy
Jańa maýsym tusaýkeserine medıa salanyń maıtalmandary, tanymal telejúrgizýshiler, kıno-telehıkaıalardyń akterleri men ártister qatysýda. Arnaıy jabdyqtalǵan stýdııada qonaqtarǵa jańa maýsymdaǵy tyń jobalar tanystyrylady.
«Habar» agenttigi jalpy efırdegi 22 jylynda kóptegen aqparattyq-saraptamalyq, áleýmettik-tanymdyq baǵdarlamalar usyndy.
«Qazirgi kúni Memleket basshysynyń bastamasymen elimizde úlken saıası, ekonomıkalyq jáne rýhanı jańǵyrý júrip jatyr. Osy istiń mańyzy men maqsatyn jetkizip, halyqty jumyldyrý, tikeleı aqparattyq jumysqa baılanysty. «Habar» - solardyń ishindegi betke ustary. Telearna kópjyldyq izdenister arqasynda úlken medıa-uıymǵa aınalyp, qazir eń basty ulttyq operatorymyz retinde qyzmet etýde», dedi QR Aqparat jáne kommýnıkatsııalar mınıstri Dáýren Abaev.
Agenttiktiń tele otbasynda, ıaǵnı «Habar», «Habar 24», «Elarna» men Kazakh TV telearnalarynda jańa baǵdarlamalar ázirlendi.
Onyń birqatary kógildir ekranǵa jýyrda ǵana jol tartsa da, óz aýdıtorııasyn jınap úlgergen «Bilý mańyzdy», «Bizdiń nazarda», «Davaıte govorıt» áleýmettik baǵdarlamalar bıyl da jalǵasady.
Besjyldyq mereıtoıyn atap ótken eldiń aqparattyq «Habar-24» arnasy osy kúzde birqatar jańa jobamen tolyqty. Basym baǵyt - aqparattyq-saraptamalyq, saıası-ekonomıkalyq, mádenı-sporttyq baǵdarlamalar. «Habar» agenttigi izgilik, adamgershilik, mahabbat, adaldyq sııaqty adamı qundylyqtardy nasıhattaý dástúrin jalǵastyra bermek.
Al «Elarna» kanaly jańa maýsymda kórermender nazaryna usynylatyn kıno, telehıkaıalar da osy ustanymǵa negizdelgen.
KazakhTVarnasyna toqtalsaq. Bul arnada kórsetiletin kontenttiń 100 paıyzy - otandyq ónim. Ol álemdegi 180 elge kórsetiledi.
«Biz agenttik retinde, úlken medıaholdıng retinde, eski dástúrlerdi buzbaı, aqparattyq-saraptamalyq baǵdarlamalar janrynda bolsyn, derekti pýblıstıkalyq janrda bolsyn, otandyq telehıkaıalar óndirisinde bolsyn, basymdyqty áleýmettik-rýhanı taqyryptarǵa bere otyryp, kórermenge jańa ónimder usynýdy ózimizdiń basty maqsat retinde sanaımyz. Birqatary efırge shyqty. Kórermenniń nazaryna usynyldy», - dedi «Habar» Agenttigi» AQ basqarma tóraıymynyń orynbasary Rınat Kertaev.