Hıýstonda Naýryzdy qalaı atap ótti

ASTANA. QazAqparat - AQSh-tyń Hıýston qalasyndaǵy (Tehas shtaty) ortalyq saıabaqtardyń birinde Naýryz meıramy atap ótildi, dep habarlaıdy «QazAqparat» HAA.

«Qurama shtattarda bul merekeni jyl saıyn Túrkııa, Bosnııa, Ózbekstan, Qyrǵyzstan, Qazaqstan, Túrikmenstan, Ázerbaıjan syndy elderdiń týmalary atap ótedi, - dedi Tehas shtatynyń turǵyny Gaýhar Sembaeva. - Saıabaqta shatyrlar tigilip, ulttyq taǵamdar qoıylady. Qyrǵyzdar úlken kıiz úı tikti, ózbekter úlken qazanǵa palaý pisirse, bosnııalyqtar saıabaqta qoı etin asty. Al qazaqtar manty, baýyrsaqtar men Naýryz kóje taratty». Ony Masha Hýsbek apaı ázirlegen. Ol Mońǵolııanyń etnıkalyq qazaǵy.

«Mońǵolııadaǵy aýylda Naýryzdy ulan-asyr toılaıtynbyz. Mindetti túrde jeti dámnen kóje pisiremiz. Bıyl Naýryzdy qyzymyz Aqerkemen qarsy alýdamyz. Biz munda qonaqqa keldik jáne mundaǵylardyń qazaq halqynyń dástúrlerin umytpaǵanyna qýanyshtymyz», - dep bólisti Masha apaı.

Saıabaqtyń sahnasynda Hıýstondaǵy «Shańyraq» jeksenbilik qazaq mektebiniń balalary óner kórsetti.

Ásel Óteýlıeva erikti retinde Hıýstondaǵy jeksenbilik qazaq mektebiniń balalaryna dombyra úıretedi.

«Balalar akkordtardy tez qaǵyp alady. Maǵan olarmen jumys isteý ońaı. Bizdiń repertýarymyzda tanymal qazaqstandyq týyndylar bar. Atap aıtqanda, «Erkem-aı», «Qamajaı» jáne taǵy basqalar bar», - dedi ol. 

Sondaı-aq, kontserttik baǵdarlamanyń sońynda ondaǵan qazaqstandyq «Qara jorǵa» ánine bı bılep, fleshmob uıymdastyrdy.

Aıta keteıik, Hıýstonda eki myń qazaqstandyq turyp jatyr.

Foto: Gaýhar Sembaevoı