Ǵylymı ortalyq zertteýleriniń tıimdiligine aýdıt júrgizildi - Saıasat Nurbek
13:22, 13 Qyrkúıek 2022
NUR-SULTAN. QazAqparat – Qazaqstan ǵalymdarynyń halyqaralyq ǵylymı jýrnaldardaǵy maqalalary artady. Bul týraly Úkimet otyrysynda tehnologııalyq serpilis ulttyq jobasyn talqylaý kezinde QR Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat.
«Ǵylymı ekojúıeniń básekege qabilettiligin arttyrý maqsatynda ǵylmı-zertteý ınstıtýttarynyń sanyn 15-ke arttyrý, ındeksteletin jýrnaldardaǵy jarııalanymdardy 150 paıyzǵa ósirý jáne 2025 jyly jabdyqtardy 30 paıyzǵa jańartý arqyly ǴZI sapasyn arttyrý mindeti tur. Sondaı-aq 2025 jyly qazaqstandyq ǵalymdardyń halyqaralyq ǵylymı jýrnaldaryndaǵy maqalalardyń jalpy sany boıynsha InSites eldik reıtınginde 65-orynǵa jáne «ǴZI sapasy» kórsetkishi boıynsha DEF JBI reıtınginde 65-orynǵa qol jetkizý josparlanǵan», - dedi S. Nurbek.
Onyń aıtýynsha, materıaldyq-tehnıkalyq jaraqtandyrýdy jańǵyrtý maqsatynda 1,7 mlrd teńge bólindi. Ǵylymı uıymdar men joǵary oqý oryndary 800-ge jýyq ǵylymı jabdyq satyp aldy. 2021 jyly jabdyqtardy jańartý úlesi 13,7 paıyzdy qurady.
«Ǵylymı ortalyqtardyń 25,8 paıyzynda olardyń jumysy men júrgiziletin zertteýlerdiń tıimdiligi men nátıjeliligi turǵysynan aýdıt júrgizildi. Ǵylymı jáne jarııalanymdyq qyzmet nátıjeleri boıynsha «Scimago Institutions rankings» halyqaralyq reıtıngine 8 qazaqstandyq ǴZI men JOO kirdi. Sondaı-aq álemdik deńgeıde ındeksteletin ǵylymı jýrnaldardaǵy maqalalardyń jalpy sany boıynsha InCites eldik reıtıngisinde Qazaqstan pozıtsııasynyń 2021 jyly 75-orynnan 73-orynǵa ósýi baıqaldy», - dedi mınıstr.
Foto:primeminister.kz