Ǵylym: Adamǵa salynǵan shoshqanyń búıregi qalypty jumys isteı bastady

MONTGOMERI. QazAqparat – Alabama ýnıversıtetiniń ǵalymdary adamnyń eki búıregin shoshqanyń genetıkalyq túrlendirilgen búıregimen almastyrý operatsııasyn jasady, dep habarlaıdy QazAqparat VVS-ge silteme jasap.

Shoshqanyń búıregin buǵan deıin mıy ólgen naýqasqa onyń otbasynyń ruqsatymen salǵan.
Medıtsına tarıhynda alǵash ret donorlyq múshe jaqsy jumys istep tur – jańa búırek ıesiniń aǵzasyn toksınderden tazartyp, zár shyǵaryp jatyr.
Biregeı operatsııanyń tolyq sıpattamasy ǵylymı qaýymdastyqtyń baǵalaýynan ótti jáne osy aptada JAMA Surgery ǵylymı jýrnalynda jarııalandy.
Ázirge bul tek bir jaǵdaı ǵana, ol sozylmaly búırek aýrýymen aýyratyn jáne transplantatsııaǵa muqtaj ondaǵan myń naýqasqa úmit syılady.
Dúnıe júzindegi donorlyq organdarǵa suranys usynystan áldeqaıda joǵary. Statıstıkaǵa sáıkes, AQSh-ta transplantatsııany kútken árbir bes naýqastyń ekeýi dıagnoz qoıylǵannan keıin sáıkes keletin donorlyq músheni kútip júrip, bes jyl ishinde qaıtys bolýda.
Sońǵy birneshe jylda osyndaı áreket eki ret jasaldy, ol týraly Bı-bı-sı jazdy.
Operatsııadan keıin patsıenttiń denesi donorlyq organdy bótensimeýi úshin transplantatsııaǵa arnalǵan shoshqa búırekteri arnaıy ósiriledi jáne genetıkalyq beıimdelý ádisimen «adamǵa saı etiledi».
DNQ tizbeginde ǵalymdar tek tórt shoshqa genin (GTKO, CMAH, B4GALNT2, GHR) taýyp, «óshiredi», sodan keıin ony adamnyń alty genimen (CD46, CD55, CD47, THBD, PROCR, HMOX1) tolyqtyrady.
Alaıda, bul joly dárigerler donorlyq organnyń barlyq fýnktsııalaryn oryndaı otyryp, qalypty jumys isteýine qol jetkizdi, olardyń bastysy - qandy súzý jáne aǵzany zııandy qaldyqtardan (eń aldymen kreatının) tazartý.