Gýmanıtarlyq kómek kútken júzdegen palestınalyq Izraıl soqqysynan qaza tapty - Al Jazeera

<p>ASTANA. KAZINFORM &ndash; Keshe, 29 aqpanda Gazanyń ońtústik-batysynda azyq-túlik kómegin kútip turǵan júzden astam palestınalyq Izraıl shabýylynan qaza tapty. Bul týraly Al Jazeera jergilikti densaýlyq saqtaý uıymdaryna silteme jasap habarlady.</p>

Gaza densaýlyq saqtaý mınıstrliginiń málimeti boıynsha, ereýilder saldarynan keminde 112 adam qaza taýyp, 750-den astam adam jaraqat alǵan.

Un tasıtyn kólikter júrip jatyr, degen habar esitken adamdar Ál-Rashıd kóshesine jınalǵan.

«Biz un alýǵa bardyq. Izraıl áskeri bizge qarsy oq atty», – dedi kýágerlerdiń biri.

Olardyń aıtýynsha, Izraıl shabýyldary jaralylar men qaza tapqandardy, sondaı-aq beıbit turǵyndardy tasymaldaǵan medıtsınalyq toptardy da nysanaǵa alǵan.

Gaza Densaýlyq saqtaý mınıstrliginiń baspasóz hatshysy Ashraf ál-Kýdranyń aıtýynsha, qaza tapqandar men jaralanǵandar Gaza qalasyndaǵy aýrýhanalarǵa jetkizilgen.

«Resýrstary shekteýli medıtsınalyq toptar aýyr jaraqat alǵandardy emdeýdi jalǵastyrýda», – deıdi ol.

Óz kezeginde Gaza úkimeti Izraıldiń Gaza qalasyndaǵy beıbit turǵyndarǵa jasaǵan shabýylyn «ádeıi jáne aldyn ala oılastyrylǵan» dep aıyptady.

«Basqynshy áskerler bul adamdardyń aımaqqa gýmanıtarlyq kómek úshin kelgenin bilgen, biraq olardy salqynqandylyqpen óltirdi», – delingen habarlamada.

Alaıda Izraıl tarapy oqıǵanyń basqa nusqasyn usynyp otyr.

Izraıl tarapynyń málimetinshe, gýmanıtarlyq kómekti taratý kezinde bolǵan qaqtyǵys saldarynan ondaǵan gazalyq qaza tapqan.

«Tańerteń gýmanıtarlyq júk kólikteri Gaza sektorynyń soltústik bóligine kirgen kezde turǵyndar júk kólikterin qorshap alyp, jetkizilgen júkterdi tonap ketken», – delingen TsAHAL resmı Telegram-kanalynda jarııalanǵan habarlamada.

Sálden keıin TsAHAL oqıǵanyń áýeden túsirilgen vıdeosyn jarııalady.

Izraıl premer-mınıstri keńsesiniń baspasóz hatshysy Avı Haıman jaǵdaıdy «qaıǵyly oqıǵa» dep atady. Ol qarapaıym turǵyndardyń ólimine jurttyń arasyna kirip ketken júk kóligi júrgizýshileri jaýapty dep málimdedi.

«Shamadan tys júk tıelgen jáne júk kólikterin basqaratyn adamdar - Gaza sektorynyń azamattyq júrgizýshileri - kópshiliktiń arasyna kirip bardy, nátıjede ondaǵan adamdyń ólimine sebep boldy», – dedi Haıman.

Onyń aıtýynsha, oqıǵaǵa qatysty tergeý amaldary júrip jatyr.

Aqparat úshin, Izraıl armııasy Gaza sektoryndaǵy shabýyldaryn 146 kún boıy jalǵastyryp jatyr.