Gúljan Shaıhybekova: MÁMS-ten tys júrgen 3,2 mln adamnyń jarna tóleýge múmkindigi bar
«Medıtsınalyq kómektiń jalpyǵa birdeı qoljetimdi bolýy, ásirese óńirlerde óte ózekti. Esterińizde bolsa, 2018-19 jyldary óńirler arasyndaǵy medıtsınany qarjylandyrý aıyrmashylyǵy 50 paıyzǵa deıin jetken bolatyn. Qazir medıtsınalyq kómektiń barlyq túri boıynsha sol aıyrmashylyqty eki ese azaıttyq.
Mindetti áleýmettik medıtsınalyq saqtandyrý júıesin engizgen 2,5 jyldyń ishinde qarjylandyrý kólemi 2 ese ósti. Búgingi tańda medıtsınalyq kómek paketin usynýǵa 2,3 trln teńge bıýdjet alyp otyrmyz. MÁMS-ti engizgenge deıin bul kórsetkish 1 trln teńge bolatyn. Degenmen, absolıýttik mánde halyqtyń medıtsınalyq kómekke jumsaıtyn shyǵyny ósip kele jatyr. Búginde ol kórsetkishti 6,2 paıyzǵa azaıttyq. MÁMS arqyly ár emdelýshige jumsalatyn shyǵyndy eki esege jýyq arttyrdyq. Ambýlatorııalyq deńgeıde kómek kórsetiletin aýrýlardyń sany 4 ese ósti», - dedi ol densaýlyq saqtaý basshylarynyń ekinshi respýblıkalyq forýmynda.
Sondaı-aq, ol keıingi 2,5 jylda medıtsınalyq kómek kórsetetin jeke menshik uıymdardyń sany 2 ese óskenin atady.
«MÁMS-pen halyqtyń 82,1 paıyzy qamtylǵan. Halyqaralyq sarapshylardyń baǵalaýyna qarasaq, bul - aıtarlyqtaı joǵary deńgeı. Biraq 3,2 mln adamnyń MÁMS júıesinen tys qalýy úlken san deýge bolady. Memleket basshysy bizdiń densaýlyq saqtaý júıesin sol úshin synap júr. Degenmen, 2,5 jyldyń ishinde birshama jaqsy jumys istedik.
Bul 3,2 mln adam ekonomıkalyq turǵyda belsendi halyq bolyp esepteledi. ıAǵnı, tabysy, medıtsınalyq saqtandyrý júıesine jarna tóleýge múmkindigi bar adamdar. Bizge medıtsınalyq kómektiń tartymdylyǵy, qoljetimdiligi boıynsha jumys isteý kerek», - dedi Gúljan Shaıhybekova.