Gúlshara Ábdiqalyqova: Praımerız - qoǵamdy údemeli demokratııalandyrý protsesiniń aıǵaǵy

QYZYLORDA. QazAqparat - «Nur Otan» partııacy Qyzylorda oblystyq fılıalynyń tóraǵasy, oblys ákimi Gúlshara Ábdiqalyqovanyń ishki partııalyq irikteý – praımerız ótkizýdiń bastalýyna oraı úndeý jarııalady, dep habarlaıdy QazAqparat tilshisi.

Gúlshara Ábdiqalyqova óz úndeýinde «Qurmetti qyzylordalyqtar! «Nur Otan» partııacymen Qazaqstannyń partııalyq-saıası damý tarıhynda alǵash ret jalpyrespýblıkalyq masshtabta praımerız ótkizilýde. Partııaishilik irikteýdiń negizgi maqsaty – Qazaqstan Respýblıkasy Parlamenti Májilisindegi jáne barlyq deńgeıdegi máslıhattardaǵy tıimdi depýtattyq korpýsty odan ári qalyptastyrý úshin básekeli jáne aıqyn negizde myqty kóshbasshylardy anyqtaý. Bul úshin nurotandyqtar qoǵamnyń senimine ıe bolǵan bedeldi partııa kóshbasshylaryn ózderi tańdaıtyn bolady.

Ókinishke qaraı, praımerız koronavırýs pandemııasy kezeńimen sáıkes keldi. Sondyqtan QR Tuńǵysh Prezıdenti – Elbasy, «Nur Otan» partııacynyń Tóraǵasy Nursultan Ábishuly Nazarbaevtyń tapsyrmasyna oraı partııanyń barlyq kúshi koronavırýspen kúres jaǵdaıynda qoldaýǵa muqtaj qazaqstandyqtarǵa kómekti uıymdastyrýǵa baǵyttalyp, praımerız jaǵdaıdyń turaqtalǵanyna deıin keıinge qaldyryldy.

Osyǵan qaraı partııaishilik irikteýge arnalǵan sharalardyń basym bóligin onlaın formatta ótkizý tapsyryldy. Qazirgi tańdaǵy jańa tsıfrlyq múmkindikterdi halyqtyń qarqyndy qoldanýyn eskersek, onlaın-format – partııanyń ashyq ári qoljetimdi bolýyn qamtamasyz etýmen qatar, turǵyndarmen keri baılanysty barynsha kúsheıtýge de múmkindik beredi», - dedi.

Onyń aıtýynsha, Praımerızdiń bul basty ereksheligi – partııa basshylyǵynyń halyqtyń densaýlyǵyn qorǵaýǵa baǵyttalǵan sharalarynyń jalǵasy.

«Myqty lıderler – Myqty partııa» qaǵıdasyn basshylyqqa alyp otyrǵan praımerız zańdy, ádil, ashyq, adal da básekelik negizde ótkizilip, halyqtyń ózekti máselelerin biletin jáne olardy sheshýge qabiletti naǵyz kóshbasshylardy anyqtaıtyn bolady.

Munan bólek, praımerız partııaǵa qatystylyǵyna qaramastan, úmitkerlerdiń barlyǵyna birdeı qoǵamnyń múddelerin bildirýge múmkindik beredi. Túrli áleýmettik toptar, ásirese áıelder men jastar úshin birdeı múmkindikter usynylǵan. Jalpy, praımerız ótkizý qazirgi zamanǵy qazaqstandyq qoǵamdy údemeli demokratııalandyrý protsesiniń aıǵaǵy bolyp tabylady.

Barlyq shynaıy patrıottardy, bastamashyl jáne jaýapkershiligi mol otandastardy aımaq pen eldi qarqyndy damytý men órkendetý maqsatynda praımerızge belsendi qatysýǵa shaqyramyn!», - dedi G. Ábdiqalyqova.