Gúlshara Ábdiqalyqova kópbalaly otbasylardy tirkeý jumysymen tanysty
Áýeli Premer-Mınıstrdiń orynbasary qujat ótkizip jatqan analarmen kezdesip, jaǵdaılaryn surady. Ózin Aqbota Jekebaeva dep tanystyrǵan bes balanyń anasy qujattary tolyq ótkenin, ataýly kómek taǵaıyndalǵanyn aıtyp, qýanyshymen bólisti.
Ortalyq qyzmetkerleri tolassyz kelip jatqan adamdardyń barlyǵyn jyldam tirkeýge tehnıkalyq kedergiler kesirin tıgizip jatqanyn aıtty. Olardyń sózine sensek, ortaq baza qaıta-qaıta tejelip, sonyń saldarynan jumys báseńsip jatyr. Qala shetinde mal ustaıtyn otbasylardyń mal-múlki týraly aqparat alý da qıyndyqtar týǵyzýda. Al saıajaı kooperatıvteri men saıajaı seriktesterinde úılerdiń mekenjaıy birizdi jazylmaǵan. Bul óz kezeginde ataýly kómek taǵaıyndaýǵa úlken kedergi keltirip otyr. Atalmysh máseleni Eńbek jáne halyqtyń áleýmettik qorǵaý mınıstri Berdibek Saparbaev nazarǵa aldy. Ortalyq qyzmetkerleri qujattardy onlaın qabyldaý júıesi 30 sáýirde toqtap qalmasa dep ótinish bildirdi. Óıtkeni, Óskemendegi 2157 kópbalaly otbasynyń tek 248-ine ǵana jańa úlgi boıynsha ataýly áleýmettik kómek taǵaıyndalyp úlgergen.
«Bul máseleni sheshýge bolady dep oılaımyn. Qajet bolsa, ýaqytyn sozý qajet. Óıtkeni qujat jınaýda túrli kedergiler bar ekenin bilemiz» - dedi Gúlshara Ábdiqalyqova.